बिजुलीको तारमा रथ ठोक्किँदा छ जनाको मृत्यु, १५ घाइते

भारत । भारतको उत्तरपूर्वी राज्य त्रिपुरामा बुधबार एउटा रथ ओभरहेड हाइटेन्सन तारसँग छोइदा कम्तीमा छ जनाको मृत्यु भएको छ भने १५ जना घाइते भएका छन् ।

घटना त्रिपुराको राजधानी सहर अगरतलाबाट एक सय २० किलोमिटर उत्तरपूर्वमा उनाकोटी जिल्लाको कुमारघाट क्षेत्रमा भएको हो । सरकारी अधिकारीका अनुसार धार्मिक यात्रामा देवता बोकेको रथलाई भक्तजनले तानेका बेला दुर्घटना भएको हो ।
घाइतेहरूलाई सरकारी अस्पतालमा भर्ना गरिएको छ । प्रहरीले दुर्घटनाको विषयमा मुद्दा दर्ता गरी अनुसन्धान सुरु गरेको जनाएको छ । रासस