सिटिजन्स, ड्रिम होटेल र फ्लामिङगोबीच सम्झौता

काठमाडौं । सिटिजन्स बैंक इन्टरनेसनल लिमिटेड, बुटवलस्थित कालिकापथ ड्रिम इन्टरनेसनल होटेल तथा बुटवलस्थित होटेल दा झ्लामिङ्गो प्रालिबीच सम्झौता भएको छ । सिटिजन्स बैंकका सेवाग्राही र मोबाइल बैंकिङ ग्राहकलाई विशेष छुट दिनेसम्बन्धी सम्झौतापत्रमा हस्ताक्षर भएको हो ।

सम्झौतापश्चात् सिटिजन्स बैंकका ग्राहकले कार्ड तथा मोबाइल बैंकिङको प्रयोगबाट भुक्तानी गर्दा ड्रिम होटेल र होटेल दा झ्लामिङ्गोमा १५ प्रतिशतसम्म छुट पाउने भएका छन् । यस किसिमको सहकार्यबाट बैंकका ग्राहकहरू लाभान्वित हुनुका साथै नगद कारोबारबाट डिजिटल कारोबारतर्फ उत्प्रेरित गर्ने विश्वास बैंकले लिएको छ ।

बैंकले डिजिटल बैंकिङ माध्यमको प्रयोगलाई बढाउन र ग्राहकलाई डिजिटल भुक्तानीमा प्रोत्साहन गर्न समयसमयमा ग्राहकमैत्री सुविधाहरू सञ्चालनमा ल्याउने गरेको कम्पनीले जनाएको छ । डिजिटल कारोबार गर्दा पाइने छुटसम्बन्धी विस्तृत विवरण बैंकको वेबसाइटमा प्राप्त गर्न सकिने छ । बैंकले देशभरि फैलिएका आफ्ना एक सय ८८ वटा शाखा, तीनवटा विस्तारित काउन्टर, एक सय ४३ वटा एटीएम, छवटा कियोस्क सेवा र ९७ वटा शाखारहित बैंकिङ इकाइबाट १६ लाखभन्दा बढी ग्राहकलाई आधुनिक बैंकिङ सेवा प्रदान गर्दै आएको छ ।