हिमालयन बैंकद्वारा मृत्यु बीमा भुक्तानी

काठमाडौं । हिमालयन बैंकले १० लाख रुपैयाँको दुर्घटना मृत्यु बीमा दाबी रकम भुक्तानी गरेको छ । बैंकका अनुसार विशेष तलबी खाता योजनामा प्रदान गर्दै आएको दुर्घटना मृत्यु बीमा सुविधाअन्तर्गत उक्त रकम दाबी रकम भुक्तानी गरिएको हो ।

बैंकका खातावाला स्व. ईश्वर गुराँगाईको दुर्घटनामा परी असामयिक निधन भएको हुँदा निजकी पत्नी श्रीमती विमला गुराँगाईलाई सो रकम गत असार १९ गते बैंकको बनेपा शाखाका शाखा प्रबन्धक सुर्योदय प्रजापतिले हस्तान्तरण गरेका हुन् । बैंकले उक्त खाता योजनामा हिमालयन एभरेस्ट इन्स्योरेन्स लिमिटेडसँग खातावालाहरूको दुर्घटना मृत्यु बीमा खरिद गरेको हो । सो रकमले मृतकको परिवारमा केही सहयोग हुन्छ भन्नेमा बैंक आशावादी रहेको जनाइएको छ ।

बैंकले विशेष तलबी खाता र नारी बचत खाता योजनामा १० रुपैयाँसम्मको दुर्घटना मृत्यु बीमा सुविधा प्रदान गर्दै आएको छ भने अन्य बचत योजनामा पाँच लाख रुपैयाँसम्मको दुर्घटना मृत्यु बीमा सुविधा प्रदान गर्दै आएको छ । बैंकले हाल देशभर रहेका एक सय ८९ शाखा, २० वटा विस्तारित काउन्टर र दुई सय ६३ भन्दा बढी एटीएम काउन्टरमार्फत वित्तीय सेवा उपलब्ध गराउँदै आएको छ ।