येलेनको भ्रमणले अमेरिका–चीनबीचको आर्थिक तनाब घटेन

अमेरिका । अमेरिकी अर्थमन्त्री जेनेट एल येलेनले आफ्नो बेइजिङ भ्रमण दुई देशबीच जारी तनाब सुधारका लागि कुनै प्रगति वा सम्झौताको घोषणा नगरी सम्पन्न गरेको द न्युयोर्क टाइम्सले जनाएको छ । दुई दिनसम्म १० घण्टा लामो भेटघाटपछि येलेन आइतबार वासिङ्टन प्रस्थान गरेकी थिइन् ।

दुई देशबीचको आर्थिक तनाब वास्तवमै कम हुने सम्भावना कम रहेको प्रतिवेदनमा उल्लेख छ । येलेनको भ्रमणबाट थप वार्ताको अपेक्षा गरिए पनि उनले वा चिनियाँ अधिकारीहरूले महत्वपूर्ण नीतिगत मुद्दाहरूमा आफ्नो अडान परिवर्तन गरेनन् । जसले गर्दा दुवै पक्षले व्यापार, लगानी र प्रविधिमा थप द्वन्द्वको सम्भावनाको सामना गर्नुपर्ने भएको छ ।

युक्रेनमा युद्ध, अमेरिकी भूमिमाथि उडेको अमेरिकी सेनाले खसालेको चिनियाँ जासुसी बेलुन, दुई देशबीच व्यापारमा बढ्दो प्रतिबन्धको आदान प्रदानलगायतका कारण अमेरिका र चीनबीचको सम्बन्ध बिग्रँदै गएको न्युयोर्क टाइम्सले जनाएको छ ।

अमेरिकी विदेशमन्त्री एन्टोनी जे ब्लिन्केनको भ्रमणको केही हप्तापछि येलेनले चीन भ्रमण गरेकी हुन् । जुलाईमा जलवायु परिवर्तनका लागि अमेरिकी राष्ट्रपतिका विशेष दूत जोन केरीले पनि चीनको भ्रमण गर्ने भएका छन् । भ्रमणका क्रममा बाइडेन प्रशासनले चीनको धेरै व्यापारिक अभ्यासका बारेमा गम्भीर चासो राखेको येलेनले स्पष्ट पारेकी थिइन् ।

चीनको सरकारी समाचार एजेन्सी सिन्ह्वाले येलेनको भ्रमणबारे बाइडन प्रशासनले व्यापार प्रतिबन्धमार्फत अमेरिकी राष्ट्रिय सुरक्षाको रक्षामा जोड दिएकोमा चीनको निरन्तर विरोधलाई प्रतिवेदनमा जोड दिइएको छ । सिन्ह्वाले चिनियाँ पक्षले अमेरिकी प्रतिबन्ध र चीनविरुद्ध प्रतिबन्धात्मक उपायहरूबारे चिन्ता व्यक्त गरेको उल्लेख गरेको छ । येलेनको भ्रमणपछि पनि चीनमा धेरैले अमेरिकाप्रति शंका व्यक्त गरेका छन् ।