‘नाडा अटो सो’का लागि बुकिङ खुला

काठमाडौं । नाडा अटोमोबाइल्स एसोसिएसन अफ नेपालले आयोजना गर्न लागेको नाडा अटो सो २०२३ को लागि स्टल बुकिङ खुला गरेको छ । हरेक वर्ष भव्यरूपमा मनाइँदै आएको सो आगामी भदौ २६ गतेदेखि ३१ गतेसम्म काठमाडौंको भृकुटीमण्डपमा आयोजना हुने भएको छ ।

नाडाले हरेक वर्ष दशैंको समयमा गर्ने यस्तो कार्यक्रम तीन वर्षदेखि हुन सकेको थिएन । कोभिड महामारीका कारण २०२०, २०२१ र २०२२ मा हुन नसकेको कार्यक्रम यस वर्ष भने भदौमा गर्न लागिएको हो । गत वर्ष भृकुटीमण्डपमा नाडाले इभी एक्सपो २०२२ को आयोजना गरेको थियो ।

आउँदो नाडा अटो सोमा चार पाँगे्र, तीन पाँग्रे तथा दुई पाँगे्र सवारी प्रदर्शनीमा राखिने आयोजकले जनाएको छ । यो वर्ष विद्युतीय गाडीलाई पनि प्राथमिकता दिइएको नाडाले जनाएको छ । सवारीका अलावा प्रदर्शनीमा ढुवानीका साधनहरू, स्पेयर पार्ट्स, टायरट्युब, ब्याट्री, एसेसरिज, अटो कम्पोनेन्ट्स् एवम् ग्यारेज उपकरणहरूसमेत राखिने भएका छन् । त्यसैगरी प्रदर्शनीमा बैंक, इन्स्योरेन्सलगायत ट्राफिक, सडक सुरक्षा र वातावरणसँग सम्बन्धित संघसंस्थाको समेत सहभागिता रहने आयोजकले जनाएको छ । प्रदर्शनीमा एक लाखभन्दा बढी दर्शकले अवलोकन गर्ने र करिब २० अर्बभन्दा बढीको कारोबार हुने अपेक्षा आयोजकको दाबी छ ।

नाडाका अनुसार कोभिडको दीर्घकालीन असर सरकारले केही सवारीको आयातमा लगाएको प्रतिबन्ध र प्रतिकूल मौद्रिक नीतिजस्ता विभिन्न कारणहरूले विगतमा सुस्ताएको अटोमोबाइल व्यवसायमा हाल आएको सुधार तथा सकारात्मकतातर्फ अग्रसर भइरहेको राष्ट्रिय अर्थतन्त्रका कारण यो प्रदर्शनी यसअघिका प्रदर्शनीभन्दा बृहत् अपेक्षा राखिएको छ । त्यसैगरी यस प्रदर्शनीमा नेपालभरका अटोमोबाइल व्यवसायीको अधिकतम सहभागिता रहने अपेक्षा समेत गरिएको नाडाले जनाएको छ ।