प्रधानमन्त्रीपत्नी सीताको हिन्दु संस्कारअनुसार किरिया नहुने

काठमाडौं । गते बुधबार बिहान निधन भएकी नेकपा (माओवादी केन्द्र)का अध्यक्ष एवं प्रधानमन्त्री पुष्पकमल दाहाल ‘प्रचण्ड’ पत्नी सीता दाहालको हिन्दु संस्कार र परम्पराअनुसार किरिया नहुने भएको छ । यद्यपि उनको बुधबार हिन्दु संस्कार र परम्पराअनुसार दाहसंस्कार गरिएको थियो ।

थापाथलीस्थित नर्भिक अन्तर्राष्ट्रिय अस्पतालमा उपचारका क्रममा ६९ वर्षको उमेरमा बुधबार बिहान ८ बजेर ३३ मिनेटमा सीताको निधन भएको थियो ।

सीता पार्किन्सन रोगका कारण लामो समयदेखि अस्वस्थ थिइन् । उनको स्वास्थ्यमा समस्या देखिएपछि बुधबार बिहानै नर्भिक अस्पताल भर्ना गरिएको थियो । सीता माओवादी केन्द्रको सल्लाहकार थिइन् । सीताको पार्थिव शरीर श्रद्धाञ्जलीका लागि पार्टी केन्द्रीय कार्यालयमा राखेर पशुपति लगिएको थियो ।

राजकीय सम्मानका साथ अन्त्येष्टि गरिएको सिताको पार्थिव शरीरमा प्रधानमन्त्री प्रचण्डले दागबत्ती दिएका थिए । प्रधानमन्त्रीको साथमा छोरीहरू रेणु र गङ्गा दाहालले सीताको पार्थिव शरीरमा दागबत्ती दिएका थिए ।

प्रधानमन्त्री प्रचण्ड बुधबारदेखि नै शोकमा बस्नेछन् । पत्नीवियोगमा रहेका प्रधानमन्त्री प्रचण्ड बुधबार, बिहीबार र शुक्रबार शोकमा बसेर शनिबार ३० गतेदेखि नियमित काममा फर्कने बताइएको छ । एक दिन शोकसभा गरेर किरिया सक्ने योजना प्रधानमन्त्री परिवारको छ । सातौँ दिनमा शोकसभा गर्ने तयारी भएको छ । प्रधानमन्त्री प्रचण्डका छोरा प्रकाशको निधन हुँदा पनि १३ दिनसम्म किरिया गरिएको थिएन ।