महिला फुटबल टिमको आधिकारिक प्रायोजक युनिलिभर

काठमाडौं । नेपालको राष्ट्रिय महिला फुटबल टिमलाई युनिलिभर नेपालले आधिकारिक प्रायोजन गर्ने भएको छ । मंगलबार कम्पनीले महिला फुटबल टिमको प्रायोजक बन्न अखिल नेपाल फुटबल संघ (एन्फा) सँग साझेदारी गरेको हो । एन्फासँग साझेदारी गरेर कम्पनीले नेपालभरि महिला फुटबलको विकासलाई बढावा दिँदै महिला सशक्तीकरण र लैङ्गिक समानताको आफ्नो प्रतिबद्धतामा अझ जोड दिएको जनाएको छ ।

यस प्रायोजनमार्फत युनिलिभर नेपालले सबै पक्षमा महिला फुटबल टोलीलाई सहयोग र प्रवद्र्धन गर्न नजिकबाट काम गर्ने सम्झौता भएको एन्फाले जनाएको छ । युनिलिभर नेपालले आफ्ना विभिन्न परियोजना एवम् सन्देशमार्फत न्याय, समानता र सामाजिक कल्याणको सशक्तीकरणमा जोड दिने बताएको छ । युनिलिभरको लाइफब्वाय र डभजस्ता ब्राण्डले स्वच्छता, स्वास्थ्य, आत्म–सम्मानको प्रवद्र्धन गर्दै, समाजद्वारा निर्धारित सौन्दर्यको मापदण्डलाई चुनौती दिनेतर्फ काम गर्ने बताएको छ ।

युनिलिभर नेपाल र एन्फा एकसाथ उभिनाले खेलकुदमा महिलाहरूको लागि भविष्य अझ उज्यालो बनाउने र महिला फुटबल खेलाडीको पुस्तालाई प्रेरित गर्न सहयोग मिल्ने कम्पनीद्वारा जारी विज्ञप्तिमा उल्लेख छ ।