सीजी एग्रोटेक र डीएमसीसीबीच सम्झौता

काठमाडौं । सीजी एग्रोटेकले विश्वको फ्ल्यागसिप फ्रि जोन डीएमसीसी र दुबई प्राधिकरणसँग कमोडिटी ट्रेडका लागि सम्झौता गरेको छ । सम्झौतापछि कृषि क्षेत्रमा दक्षिण एसियाका राष्ट्रहरूसँग द्विपक्षीय व्यापार बढाउन मद्दत पुग्ने सीजी एग्रोटेकको विश्वास छ ।

हालै सम्पन्न समारोहमा एग्रोटेकका प्रबन्ध निर्देशक वरुण चौधरी र डीएमसीसीका चिफ अपरेटिङ अफिसर फेरयाल अहमदीले सम्झौतापत्रमा हस्ताक्षर गरेका थिए । यस सहकार्यले डीएमसी र सीजीएग्रोटेकबीच बलियो सम्बन्ध स्थापना गर्नुका साथै डीएमसीसीका सदस्य कम्पनीका लागि व्यापार, लगानी र बजार पहुँच बढाउनसमेत सहयोग पुग्ने कम्पनीले जनाएको छ ।

यसबाहेक साझेदारीले ज्ञान र सूचनाको आदानप्रदानलाई बढावा दिनेछ भने विशेषगरी कफी, चिया र महको निर्यातमा रहेका अवसर तथा अप्ठ्याराहरूको सम्बोधन गर्न मद्दत गर्ने विश्वास कम्पनीको छ ।

सम्झौताले नेपाल र युएईबीच रहेको कृषि व्यापार सम्बन्ध अझ सुदृढ र बलियो हुने प्रबन्ध निर्देशक चौधरीले बताए । डीएमसीसीसँग रहेको २३ हजार सदस्य कम्पनीहरूको व्यापक नेटवर्कको लाभ उठाउँदै र पारस्परिकरूपमा लाभदायक अवसरहरूको अन्वेषणले द्विपक्षीय व्यापारलाई अझ व्यापक बनाउनका लागि यसले महत्वपूर्ण प्रभाव पार्ने उनको भनाइ छ । डीएमसीसीका चिफ अपरेटिङ अफिसर फेरयाल अहमदीका अनुसार हालका वर्षहरूमा दक्षिण एसियामा कृषि वस्तुको आयातमा उल्लेखनीय वृद्धि भएको र यो वृद्धिदर जारी रहने देखिएको छ । साथै, खाद्य सुरक्षामा आएको जागरुकताका कारण विश्वव्यापीरूपमा कृषि वस्तुहरूको माग अझ बढ्ने उनले जनाएका छन् ।

सीजीएग्रोटेकले चिया, कफी र महलगायत उच्चगुणस्तरका जडीबुटी र उत्पादनहरूको निर्यात गर्दै आएको छ । सीजीएग्रोटेक र डीएमसीसीबीचको सहकार्यले यस क्षेत्रको कृषि व्यापारमा नयाँ आयाम ल्याउने र कृषि क्षेत्रको वृद्धिलाई सहज बनाउँदै नेपाल र दक्षिणपूर्वी एसियाबीचको सम्बन्धलाई अझ बलियो बनाउने अपेक्षा गरिएको छ ।