नबिल इन्भेस्टमेन्ट र तेह्रथुम पावरबीच सम्झौता

काठमाडौं । नबिल इन्भेस्टमेन्ट बैंकिङ र तेह्रथुम पावर कम्पनीबीच सम्झौता भएको छ । तेह्रथुम पावर कम्पनीको सञ्चालक समितिको निर्णयानुसार आफ्ना सेयरधनीलाई १ः१ को अनुपातमा निकट भविष्यमा जारी गर्न लागिएको हकप्रद निष्काशनका लागि निष्काशन तथा बिक्री प्रबन्धक चयन गर्ने विषयमा सम्झौता भएको हो ।

सम्झौतापत्रमा कम्पनीको तर्फबाट प्रबन्ध निर्देशक मोहन कुमार डाँगी र इन्भेस्टमेन्टको तर्फबाट प्रमुख कार्यकारी अधिकृत मनीष नारायण जोशीले हस्ताक्षर गरेका छन् । तेह्रथुम पावर कम्पनी लिमिटेड कम्पनी ऐन २०६३ अन्तर्गत् विसं २०६६ स्थापना भई विसं २०७५ असारमा प्राइभेट कम्पनीबाट पब्लिक लिमिटेड बनेको कम्पनी हो ।

सात दशमलव पाँच मेगावाट विद्युत् उत्पादन क्षमताको यस कम्पनीको विद्युत् खरिदसम्बन्धी सम्झौता २०७३ साल कार्तिक महिनामा नेपाल विद्युत् प्राधिकरणसँग भएको थियो ।

सम्झौतामा नबिल इन्भेस्टमेन्टले तेह्रथुम पावर सर्वसाधारणमा हकप्रद सेयर निष्काशनका लागि पूर्वतयारीमा रहेको जनाएको छ । पूर्वतयारी सम्पन्न भएपछि नियामक निकायबाट हकप्रद सेयर निष्काशनका लागि अनुमति माग गरिने विज्ञप्तिमा उल्लेख छ ।