थप पाँच कम्पनीले पाए ब्रोकर लाइसेन्स

काठमाडौं । नेपाल धितोपत्र बोर्डले सेयर दलालसम्बन्धी कारोबार सञ्चालनका लागि अनुमतिपत्रको आशयपत्र (एलओआई) दिएका ४३ कम्पनीमध्ये पछिल्लो पटक थप पाँचवटा कम्पनीलाई धितोपत्र दलाल व्यवसायी (स्टक ब्रोकर) को लाइसेन्स दिएको छ । बोर्डका कार्यकारी निर्देशक एवं प्रवक्ता मुक्तिनाथ श्रेष्ठका अनुसार धितोपत्र बोर्डको बिहीबार बसेको सञ्चालक समितिको बैठकले सीमित र पूर्ण कार्य गर्नेगरी थप पाँचवटा कम्पनीलाई ब्रोकर लाइसेन्स दिएको हो ।

लाइसेन्स पाउने नयाँ ब्रोकर कम्पनीहरूमा सजिलो ब्रोकर लिमिटेड, रोडसो सेक्युरिटिज लिमिटेड, बेनी सेक्युरिटिज प्रालि, हिमालयन सेक्युरिटिज लिमिटेड र सनी सेक्युरिटिज लिमिडेड छन् । तीमध्ये सजिलो, रोडसो र बेनीले सीमित कार्य गर्नेगरी अनुमति पाएको प्रवक्ता श्रेष्ठले जानकारी दिए । हिमालयन र सनीले भने पूर्ण कार्य गर्ने धितोपत्र दलाल कम्पनीको रूपमा लाइसेन्स पाएका हुन् ।

बोर्डले २०७९ असोज २ गते ३० दिनको अवधि तोकेर धितोपत्र दलाल व्यवसायीको लाइसेन्सका लागि आवेदन मागेको थियो । त्यसपछि ४५ कम्पनीले आवेदन दिएका थिए । बोर्डले धितोपत्र व्यापारीको लाइसेन्सको लागि न्यूनतम चुक्ता पुँजी एक अर्ब ५० करोड तोकेको छ भने पूर्ण कारोबार गर्ने धितोपत्र दलालको लागि ६० करोड र सीमित कार्य गर्ने धितोपत्र दलाल व्यवसायीको लागि न्यूनतम चुक्ता पुँजी २० करोड रुपैयाँ तोकेको छ । चुक्ता पुँजी, ब्रोकर कम्पनीको लागि आवश्यक पूर्वाधार, कागजपत्र पुगेका कम्पनीहरूलाई बोर्डले अनुमति दिने गरेको प्रवक्ता श्रेष्ठले जानकारी दिए ।