भारतले खाना पकाउने ग्यासको मूल्य घटायो

भारत । भारतले खाना पकाउने ग्यासको मूल्यमा दुई सय रुपैयाँ कटौती गरेको छ । केन्द्र सरकारले भारतभरका घरपरिवारलाई राहत दिने उद्देश्यले खाना पकाउने ग्यासको मूल्य कटौती गरेको हो । केन्द्रीय मन्त्रिपरिषद्को निर्णयबारे पत्रकारहरूलाई जानकारी दिँदै सूचना तथा प्रसारण मन्त्री अनुराग सिंह ठाकुरले यो निर्णय प्रधानमन्त्री नरेन्द्र मोदीले ओणम र रक्षाबन्धनमा देशका महिलाहरूलाई उपहार दिएको बताएका छन् ।

केन्द्र सरकरको यो निर्णय बुधबारदेखि नै लागू भएको छ । १४ दशमलव दुई केजीको ग्यास सिलिन्डरको मूल्य देशभर दुई सय रुपैयाँले घटेको छ । यो निर्णयपछि ग्यासको मूल्य प्रतिसिलिन्डर एक हजार एक सय तीन रुपैयाँबाट घटेर नौ सय तीन रुपैयाँमा झरेको छ । उज्ज्वला परिवारले भने प्रतिसिलिन्टर दुई सय रुपैयाँको विद्यमान लक्षित अनुदानको अतिरिक्त हो । जसअनुसार उज्ज्वला लाभग्राहीले प्रतिसिलिन्डर सात सय तीन रुपैयाँमा ग्यास पाउनेछन् । भारतमा करिब नौ करोड ६० लाख उज्ज्वला परिवार एलपीजी ग्यासको उपभोक्ता छन् ।

मन्त्री ठाकुरले वर्तमान सरकारले महिलाहरूको विकासको लागि धेरै योजनाहरू सुरु गरेको पनि जानकारी गराएका छन् । उनले पक्की घर, शौचालय, अतिरिक्त खाद्यान्न र प्रत्यक्ष लाभ स्थानान्तरणलगायतका सुविधा दिने योजना रहेको बताए ।

भारत आफ्नो प्राकृतिक ग्यासको आवश्यकताको ६० प्रतिशत आयातमा निर्भर छ । उज्ज्वलाको बाँकी आवेदनलाई स्वीकृत गर्न र सबै योग्य परिवारहरूलाई डिपोजिट–फ्री ग्यास सहयोग प्रदान गर्न, सरकारले चाँडै गरिब परिवारका ७५ लाख महिलाहरूलाई पीएमयूवाई कनेक्सन वितरण सुरु गर्ने बताएको छ ।