उधारो असुली ऐन ल्याउन व्यवसायीको माग

काठमाडौं । कागज व्यवसायीले उधारो असुली ऐन ल्याउन सरकारसँग माग गरेका छन् । कागज व्यवसायी संघ नेपालको २२औँ वार्षिक साधारणसभामा सहभागी व्यवसायीले उधारो असुली ऐनको अभावमा व्यवसायीले अनेकौँ झमेलाको सामना गर्नुपरेको बताउँदै सो ऐन यथाशीघ्र जारी गर्न सरकारसँग माग गरेका हुन् ।

संघका अध्यक्ष मनोहरदास मूलको सभापतित्वमा सम्पन्न साधारणसभामा व्यवसायीहरूले वर्तमान आर्थिक परिदृश्यको समीक्षाका साथै कागज व्यवसायका चुनौतीमाथि व्यापक छलफल गरेका थिए । संघको सभाले उधारो असुली ऐन यथाशीघ्र जारी गर्न सरकारको ध्यानाकर्षण गराउने, आयकर, मूल्य अभिवृद्धिकर, भन्सार मूल्याङ्कन र क्षेत्रमा विद्यमान अप्ठ्यारा हटाउन पहल गर्नेलगायत प्रस्ताव पारित गरेको छ । यस्तै, पछिल्लो समय आर्थिक गतिविधि सुस्ताएको र व्यवसायीको मनोबल गिर्दै गएको विषयमा पनि सरकारलाई गम्भीर भएर सोच्न र तदनुरूप कार्ययोजना ल्याउन आग्रह गर्ने निर्णय साधारण सभाले गरेको छ ।

सभाले कार्यसमितिको वार्षिक प्रतिवेदन र आर्थिक वर्ष २०७९/८० को लेखापरीक्षण प्रतिवेदन पारित गरेको छ । यसैगरी सभाले मनोहरदास मूलको अध्यक्षतामा आगामी तीन वर्षे कार्यकालका लागि नयाँ कार्यसमिति समेत निर्विरोध चयन गरेको छ । कार्यसमितिमा उपाध्यक्ष राजेन्द्र काबरा, महासचिव दिनेश चोखानी र कोषाध्यक्ष कमल तोदी रहेका छन् ।