नेपाल बैंक र एसियाली विकास बैंकबीच व्यापार वृद्धिको लागि साझेदारी

काठमाडौं । नेपाल बैंक लिमिटेडले एसियाली विकास बैंकसँग व्यापार वित्तीय क्षमता अभिवृद्धि गर्ने सम्झौतामा हस्ताक्षर गरेको छ । नेपाल बैंक लिमिटेडले एसियाली विकास बैंकसँग एडीबीको ट्रेड एन्ड सप्लाई चेन फाइनान्स कार्यक्रमअन्तर्गत सम्झौता गरेको हो ।

कार्यक्रमले व्यापार वित्तीयको आवश्यकतालाई सम्बोधन गर्न व्यापारिक ऋण र आवश्यक सहयोग प्रदान गरेर अन्तर्र्राष्ट्रिय व्यापार र विकासलाई टेवा पु-याउने छ । २०२२ मा एडीबीले गरेको १० हजारभन्दा बढी व्यावसायिक कारोबारमार्फत सात दशमलव सात बिलियन डलरभन्दा बढीको व्यापारिक सहयोगमध्ये ६० प्रतिशतभन्दा बढी साना र मध्यम आकारका व्यवसाय रहेका थिए ।

नेपालको पहिलो बैंक नेपाल बैंक लिमिटेडसँग साझेदारी गर्ने पहिलो नेपालको सरकारी बैंक भएको छ र यो सम्झौताले दुई सयभन्दा बढी देशबाट अन्तर्राष्ट्रिय व्यापार गर्न सहयोग प्रदान गर्नेछ । नेपाल बैंक लिमिटेडको वित्तीय अवस्था, संस्थागत सुशासन, जोखिम र अनुपालनका मुख्य क्षेत्रमा व्यापक छलफल र सहकार्यपछि एसियाली विकास बैंकसँग यो सम्झौता हुन सम्भव भएको हो ।

सम्झौतामा एडीबीका टीएससीएफपीका प्रमुख स्टिभन बैैंक, नेपाल बैंक लिमिटेडका प्रमुख कर्जा अधिकृत लक्ष्मण पौडेलले हस्ताक्षर गरेका थिए । कार्यक्रममा प्रमुख कार्यकारी अधिकृत श्री कृष्णबहादुर अधिकारीले ‘हामी एसियाली विकास बैंकसँग व्यापार वित्तीय सम्झौता गर्न पाउँदा खुसी छौं र हामीले साना तथा मध्यम प्रकृतिका व्यवसायीबीच हाम्रो उपस्थितिलाई अझ बढाउँदै हाम्रा ग्राहकको व्यापारिक गतिविधिलाई सहयोग गर्न र कर्जा सुविधा उपयोग गराउन तत्पर छौँ’ भन्ने धारण व्यक्त गरे । उक्त समारोहमा एडीबी नेपाल रेसिडेन्ट मिसनका प्रमुख अर्नाउड हेकमनको उपस्थिति रहेको थियो ।