बुद्ध एजुकेसन फाउन्डेसनले मनायो रजत जयन्ती

काठमाडौं । लर्ड बुद्ध एजुकेसन फाउन्डेसनले रजत जयन्ती मनाएको छ । २५ वर्ष अगाडि सूचना प्रविधिको क्षेत्र लक्षित छुट्टै कलेज स्थापना गरेर फाउन्डेसनले प्राविधिक शिक्षाको दीर्घकालीन सोच बनाएको थियो । आईटीमा स्नातकोत्तरसम्म अध्ययन हुने फाउन्डेसनबाट अहिलेसम्म १२ हजारभन्दा बढी विद्यार्थी दीक्षित भइसकेका छन् ।

फाउन्डेसनले विगतमा १० हजार महिलालाई निःशुल्क कम्प्युटर तालिम र अहिले सातै प्रदेशमा एक एक जना किशोरीलाई प्रत्येक वर्ष निःशुल्क शिक्षा उपलब्ध गराउँदै आएको छ । भरपर्दो र गुणस्तरीय प्राविधिक शिक्षाको मागलाई मध्यनजर गरेर फाउन्डेसनले स्नातक र स्नातोकोत्तर तहमा प्राविधिक विषयलाई परिष्कृत समेत गर्दै लगेको छ । रजत जयन्तीका अवसरमा फाउन्डेसनमा दुई दशकदेखि संलग्न रहँदै आएका नौ जनालाई उपराष्ट्रपति रामसहाय प्रसाद यादवले सम्मान गरेका थिए ।