एनसेल फोरजी कर्णाली र सुदूरपश्चिमका दुर्गम जिल्लाहरूमा

काठमाडौं । एनसेल आजियाटा लिमिटेडले कर्णाली र सुदूरपश्चिम प्रदेशका दुर्गम जिल्लाहरूमा आफ्नो सेवा विस्तार गरेको छ । कम्पनीले मुगु, डोल्पा, हुम्ला र बाजुराका सदरमुकाममा उच्च गतिको मोबाइल ब्रोडब्यान्ड सेवा विस्तार गरेको हो ।

फोरजी सेवा सुरु गर्न एनसेलले गत एक महिनामा ठूलीभेरी नगरपालिका (डोल्पा), छायानाथ रारा नगरपालिका (मुगु), बडिमालिका नगरपालिका (बाजुरा) र सिमीकोट गाउँपालिका (हुम्ला) मा एक–एक गरी चारवटा फोरजी बेस ट्रान्ससिभर स्टेसन (बीटीएस) स्थापना गरेको छ । कम्पनीले भी–स्याट प्रविधिलाई प्रतिस्थापन गर्दै फोरजी सेवा सञ्चालन गरेको कम्पनीले जनाएको छ ।

एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले कर्णाली प्रदेश र सुदूरपश्चिम प्रदेशका सबै जिल्लालाई फोरजीले जोडेको बताए । एनसेलले फोरजी सेवा विस्तार र क्षमता अभिवृद्धिलाई उच्च प्राथमिकतामा राख्दै आएको उनको भनाइ छ । यस्तै, मनाङ जिल्लालाई पनि छिट्टै फोरजीले जोड्ने योजनासहित काम गरिरहेको उनले जानकारी दिए ।