लिबियामा बाढीबाट २० हजारले ज्यान गुमाएको आशंका

एजेन्सी । लिबियामा ड्यानियल आँधीसँगै परेको मुसलधारे वर्षापछिको बाढीले दुईवटा बाँध भत्काउँदा करिब २० हजार जनाको ज्यान गुमेको आशंका गरिएको छ । बिहीबार साँझसम्म पाँच हजार तीन सयभन्दा बढीको मृत्यु भइसकेको र कम्तीमा १० हजारभन्दा बढी हराइरहेको अन्तर्राष्ट्रिय सहायता निकायहरुले उल्लेख गरेका छन् ।

पूर्वी लिबियाको बन्दरगाह सहर डेर्नाका प्रमुख अब्दुलमेनम अल–गैथीधच अनुसार बाढीमा परी १८ हजारदेखि २० हजार मानिसको मृत्यु भएको छ । दुईवटा बाँध फुट्दा डेर्ना नगर र आसपासका जिल्लाका बासिन्दाको तथ्यांकमा आधारित भएर उनले त्यति धेरै लिबियालीले ज्यान गुमाएको बताएका हुन् ।

बाढीले भत्काएका सडकका चेप र खोच तथा समुद्र किनारमा पु-याएका शव निकाल्ने काम भइरहेको छ । बाढीबाट ५० हजारभन्दा बढी विस्थापित भएका छन् । पूर्वी सहर डेर्नामा कम्तीमा ३० हजार घरबारबिहीन भएका आप्रवासनसम्बन्धी अन्तर्राष्ट्रिय संगठन (आईओएम)ले जनाएको छ ।

लिबियाका दुवै प्रतिद्वन्द्वी सरकारले बाढीपीडितहरूको लागि राहत सामग्री परिचालनमा समन्वय गरिरहेका छन् भने इजिप्ट, ट्युनिसिया, इटाली, स्पेन र टर्कीलगायत देशबाट उद्धार टोली त्रिपोली पुगेका छन् ।