डेल्टिन नेपालद्वारा कम्प्युटर ल्याब हस्तान्तरण

काठमाडौं । डेल्टिन नेपाल प्राइभेट लिमिटेडले श्री नन्दी माध्यामिक विद्यालयलाई कम्प्युटर ल्याब हस्तान्तरण गरेको छ । कम्पनीले एक कार्यक्रमका बीच विद्यालयलाई कम्प्युटर ल्याब हस्तान्तरण गरेको हो । कार्यक्रममा नेपाली कांग्रेसका महामन्त्री एवम् पूर्व स्वस्थ्य तथा जनसंख्यामन्त्री गगन कुमार थापाले कम्प्युटर ल्याब हस्तान्तरण गरेका थिए ।

कार्यक्रममा थापाले डेल्टिन नेपालको यो सामाजिक उत्तरदायित्वअन्तर्र्गतको कम्युटर ल्याब हस्तान्तरणले नन्दी विद्यालयका विद्यार्थीहरूको भविष्यमा महत्वपूर्ण भूमिका खेल्ने बताए । त्यसैगरी डेल्टिन नेपालका अपरेसन हेड शुभान्वित गुरुङले कम्पनीको यो सामाजिक कार्यलाई भोलिका दिनमा पनि निरन्तरता दिने उल्लेख गरे ।

कम्प्युटर ल्याबबाट विद्यार्थी भाइबहिनीले धेरैभन्दा धेरै लाभ लिनेमा आफू ढुक्क भएको सुनाए । डेल्टिन नेपालले १७ लाख रुपैयाँको लगानीका २३ वटा कम्प्युटर, प्रोजेक्टर, तीन वटा फ्यानसहित कम्प्युटर ल्याब हस्तान्तरण गरेको छ । डेल्टिन नेपाल प्राइभेट लिमिटेडको सुरुवात डेल्टिन ग्रुपकोे अन्तर्राष्ट्रिय भेन्चरको रूपमा २०७५ साल भदौ १४ काठमाडौंको मेरियट होटलमा खोलिएको थियो । अहिले २५० जनाले रोजगारी पाएका छन् ।