‘विश्व सांस्कृतिक उत्सव–२०२३’ मा नेपाल

काठमाडौं । अमेरिकाको वासिङ्गटन डिसीस्थित मेट्रो एरियामा आयोजना भएको विश्व सांस्कृतिक उत्सव २०२३ मा नेपालले पनि सहभागिता जनाएको छ । सेप्टेम्बर २९ देखि अक्टोबर १ सम्म तीन दिने सो उत्सवमा एक सय ८० राष्ट्रले सहभागी जनाएको छन् ।

सहभागी राष्ट्रले आफ्नो मौलिक संस्कृतिसम्बन्धी प्रस्तुति गरेका छन् । संसारभरका विभिन्न संस्कृतिलाई एकै ठाउँमा ल्याई एकै सूत्रमा बाँध्ने काम आर्ट अफ लिभिङका संस्थापक तथा आध्यात्मिक गुरु श्रीश्री रविशंकरले गरेका हुन् । हालसम्म पाँच लाखभन्दा बढी सहभागीले कार्यक्रममा सरिक भएर सांस्कृतिक विविधताको महत्वमाथि ऐक्यबद्धता जनाएका छन् । कार्यक्रममा विभिन्न राष्ट्रले आफ्नो देशको भेषभूषा, नृत्य, संगीत तथा परिकारको प्रस्तुति देखाइरहेका छन् । नेपालले पनि विभिन्न समुदायको सात मौलिक नृत्यहरू सोही समुदायको सांस्कृतिक पहिरन पहिरिएर प्रस्तुति गरेको छ । नेपालको टोलीमा १३ वर्षदेखि ६० वर्षसम्मका एक सय ५० जना कलाकारहरू रहेका छन् । नेपालको सांस्कृतिक टोलीको प्रायोजन राजेशबहादुर प्रधान तथा निभा माथेमा प्रधानले गरेका छन् । नेपालको ‘विश्व सांस्कृतिक उत्सव २०२३’ मा सहभागिताले नेपाललाई विश्वमा चिनाउन सहयोगी हुने बताइएको छ ।

यस वर्ष हुन लागेको ‘विश्व सांस्कृतिक उत्सव २०२३’ चौथो संस्करण हो, सन् २००६ मा बैंगलोरमा आयोजना भएको पहिलो संस्करणमा पच्चीस लाख सहभागी थिए । त्यसैगरी, दोश्रो संस्करण जुन बर्लिनमा सन् २०११ मा सम्पन्न भएको थियो भने तेस्रो संस्करण सन् २०१६ मा दिल्लीमा आयोजित भएको थियो ।