दोलखामा थप चार केजी अवैध सुन बरामद

दोलखा । दोलखा प्रहरीले उत्तरी छिमेकी देश चीनबाट अवैधरूपमा भित्र्याइएको थप चार केजी सुन आइतबार बरामद गरेको छ । एक साताभित्र दोलखा प्रहरीले चिनियाँ नाकाबाट तस्करी गरेर ल्याएको ११ केजी सुन बरामद गरिसकेको छ ।

नेपाल प्रहरी र सशस्त्र प्रहरी बल १८ नम्बर गुल्म (बीओपी लामाबर)को संयुक्त टोलीले आइतबार बिगु गाउँपालिका–१ लामाबगरबाट थप चार केजी सुन बरामद गरेको हो । बारीमा ढुंगाले थिचेर लुकाएको अवस्थामा आइतबार दिउँसो सो सुन बरामद गरेको दोलखाका प्रहरी प्रमुख दीपक खड्काले जानकारी दिए । यसअघि प्रहरीले बुधबार सिंगटीको जामुनेस्थित एक होटलबाट चार केजी र शुक्रबार सोही होटलबाट थप तीन केजी सुन बरामद गरेको थियो ।

यस्तै, प्रहरीले सो सुन तस्करीमा संलग्न ७ जनालाई पक्राउ गरी अनुसन्धान गरिरहेको छ । प्रहरीले गत बुधबार सिंगटीबाट केशर तामाङ, पेम्बा तामाङ र माधव मगरलाई पक्राउ गरेको थियो । यस्तै, बिहीबार नुर्वु छिरिङ शेर्पा र सुनमाला तामाङलाई बिहीबार दिउँसो दोलखाको सदरमुकाम चरिकोटबाट, शुक्रबार राज तामाङलाई काठमाडौंबाट र आइतबार चसमान तामाङलाई लामाबगरबाट पक्राउ गरेको हो । पक्राउ परेका सबै बिगु गाउँपालिका–१ लामाबगरका स्थानीय हुन् ।

सुन तस्करहरूले स्थानीयको प्रयोग गरेका चीनबाट अवैध सुन भित्र्याएको हुन सक्ने प्रहरीको अनुमान छ । सुन कसले मगाएको हो भन्ने खुल्न बाँकी रहेको र खोज अनुसन्धान भइरहेको प्रहरीले जनाएको छ । पक्राउ परेकाहरू भरिया मात्रै भएको प्रहरीको प्रारम्भिक अनुसन्धानले देखाएको छ । चिनियाँ बजार फलाकबाट चीनको रोङजिया नाका हुँदै ११ केजी सुन पैदलमार्गबाट जिल्ला भित्रिएको अनुमानमा प्रहरीले उक्त क्षेत्रमा निगरानी बढाएको छ ।