अनुदानको मल व्यापारीको कब्जामा

दोलखा । सरकारले सहकारीमार्फत अनुदानमा किसानको लागि उपलब्ध गराएको रासायनिक मल सहकारीहरूले व्यापारीहरूलाई दिएर महँगोमा बेच्न गरेको पाइएको छ । बैतेश्वर गाउँपालिकाले केही दिनअघि गरेको बजार अनुगमनको क्रममा केही सहकारीहरूले व्यापारीलाई मल दिएर महँगोमा बेच्न लगाएको भेटिएको हो ।

बैतेश्वर गाउँपालिकाभित्र मल ल्याउने र किसानलाई वितरण गर्ने मान्यता प्राप्त केही कृषि सहकारीले दर्जनौँ बोरा मल लुकाएर महँगोमा किसानलाई बेच्ने गरेको फेला परेको गाउँपालिका अध्यक्ष छवि लामाले बताए । उक्त कृषि सहकारी संस्थाको पहिचान गरी कारबाही गर्ने अध्यक्ष लामाले जानकारी दिए । अनुगमनको क्रममा विभिन्न वडाका कृषि सहकारीले गाउँपालिकाको सिफारिसमा अनुदान छुटमा मल ल्याएर व्यापारीलाई बेच्न दिने तथा किसानबाट बढी मूल्य लिने गरेको भेटिएको थियो । पालिकाले ती सहकारीहरूलाई अर्कोपटक मल ल्याउने सिफारिस समेत नदिने गरी कारबाही गर्ने जनाएको छ । किसानले खेती गर्ने समयमा मल पाउन नसक्ने, मुख्य समयमा मल अभाव हुने तथा कालोबजारी गर्ने व्यापारीलाई समेत मल बेचेको पाइएमा जरिवाना गर्ने गाउँपालिकाका प्रशासन प्रमुख अधिकृत रवीन्द्र चौलागाईंले बताए ।

अनुगमनका क्रममा व्यापारीहरूले गोदाममा लुकाएर राखेको अवस्थामा समेत मल फेला परेको छ । खेती लाउने समयमा किसानलाई मल अभावको समस्या देखाएर सहकारीले व्यापारीहरूसँगको सेटिङमा महँगोमा मल बेचेको स्थानीय किसानहरूको दुःखेसो रहेकोे छ । बैतेश्वर गाउँपालिकाले लगातार पाँच दिन बजार अनुगमन गरेको थियो । सो क्रममा दुई दर्जन साना तथा ठूला व्यापारी कारबाहीमा परेका छन् ।

अनुगमणका क्रममा करिब १० लाख रुपैयाँ बराबरको म्याद गुज्रिएको दैनिक उपभोग्य वस्तु नष्ट गरिएको प्रतिवेदन बैतेश्वर गाउँपालिकाले सार्वजनिक गरेको छ । यस्तै, म्याद गुज्रिएको खाद्यान्न बेच्ने दुईवटा होलसेल पसल सिल गरिएको छ ।