कजरिया टायल्सले नेपालमै गुणस्तरीय सेरामिक्स उत्पादन गर्ने

काठमाडौं । कजरिया रमेश टायल्सले नेपालमै सेरामिक्स उत्पादन गर्ने भएको छ । एभरेस्ट बैंकको सहवित्तीयकरणअन्तर्गत सहभागी बैंकहरूबीच वित्तीय सहजीकरण गर्नेसम्बन्धी सम्झौता भएको हो । बैंकको तर्फबाट एभरेस्ट बैंकका प्रमुख कार्यकारी अधिकृत सुदेश खालिङ तथा रमेश टायल्सको तर्फबाट कम्पनीका उपाध्यक्ष रोहित गुप्ताले सम्झौतापत्रमा हस्ताक्षर गरे । कार्यक्रममा सह–वित्तीयकरणका अन्य सदस्य बैंकहरू नबिल बैंक, नेपाल एसबीआई बैंक र प्रभु बैंकका उच्च पदस्थ अधिकारीहरू समेतको उपस्थिति रहेको थियो ।

नेपाललाई टायल्स उत्पादनमा आत्मनिर्भर बनाउने उद्देश्यका साथ नवलपरासीमा रहेको प्लान्टबाट उत्पादन हुने टायल्सको कुल लागत चार सय करोडमध्ये सह–वित्तीयकरणअन्तर्गत तीन सय करोड रुपैयाँ लगानी रहने बताइएको छ । विश्वको सातौँ ठूलो टायल्स उत्पादन कम्पनी कजरिया सेरामिक्स भारतको संयुक्त लगानी रहेको कजरिया रमेश टायल्स लिमिटेडले नेपालमा आधुनिक उपकरणहरू प्रयोग गरी गुणस्तरीय टायल्स तथा सेरामिक्सका अन्य उत्पादनहरू अन्तर्राष्ट्रिय मापदण्डबमोजिम गुणस्तरीय हुने जनाएको छ ।

मार्च २०२४ बाट सुरुवात हुने उक्त परियोजनाले देशमा हुने टायल्सको माग पूरा गरी आयात प्रतिस्थापन गर्नेमा महत्वपूर्ण योगदान गर्ने विश्वास लिइएको छ । बैंकमा हालसम्म करिब १३ लाखभन्दा बढी ग्राहकहरू रहेको र देशभर एक सय २७ शाखाबाट तीनवटा एक्स्टेन्सन काउन्टर, सातवटा प्रादेशिक कार्यालय, एक सय ६२ वटा एटीएमसहित विश्वव्यापी नेटवर्कबाट अत्याधुनिक मोबाइल, इन्टरनेट र एसएमएस बैंकिङ सुविधा प्रदान गर्दै आइरहेको छ । बैंकले नेपाल सरकारको राजस्व संकलनका लागि ३२ वटा संकलन केन्द्रबाट समेत सेवा दिँदै आएको जनाएको छ ।