दोस्रो ‘स्पेस एन्ड डिजाइन एक्स्पो’ हुने

काठमाडौं । आईआईएफटी स्कुल अफ फेसन एन्ड इन्टेरियर डिजाइनको आयोजनमा दोस्रो ‘स्पेस एन्ड डिजाइन एक्स्पो’ नामक प्रदर्शनी आयोजना हुनेभएको छ । ललितपुरको लबिम मलमा यही असोज २५ र २६ गते प्रदर्शनी आयोजना हुनेछ ।

सो प्रतियोगितात्मक प्रदर्शनीमा आईआईएफटी स्कुल अफ फेसन एन्ड इन्टेरियर डिजाइनमा अध्यायनरत ८० विद्यार्थीका इन्टरियरसम्बन्धी सिर्जनाहरू राखिनेछ । विशिष्ट व्यक्तिहरूको उपस्थितिमा उद्घाटन, प्रमाण पत्र तथा पुरस्कार वितरण र दीक्षान्त गरेर प्रदर्शनी तीन चरणमा आयोजना हुनेछ । बर्जर पेन्ट्स र प्राइम टाइलको मुख्य प्रायोजन रहेको प्रदर्शनीमा सहभागी ३० विद्यार्थीले थेसिस प्रोजेक्टको रूपमा आफ्नो कला प्रदर्शनीमा प्रस्तुत गर्नेछन् भने अर्काे ३० विद्यार्थी कार्यक्रमको समापनसँगै दीक्षान्त समारोहमा सहभागी हुनेछन् । जहाँ, उनीहरूलाई व्यावसायिक इन्टेरियर डिजाइनरको पदवी प्रदान गरिनेछ । बाँकी विद्यार्थीले क्याफे डिजाइन थिममा रेस्टुरेन्ट र क्याफेहरू कसरी आकर्षक डिजाइन गर्न सकिन्छ भनेर प्रस्तुत गर्ने आईआईएफटीकी कार्यकारी निर्देशक विपना थापाले जानकारी दिइन् ।

प्रदर्शनीमा सहभागी इन्टेरियर डिजाइन अध्ययन गरेका र प्रदर्शनीमा सहभागी थेशिश प्रोजेक्ट र क्याफे डिजाइन थिममा आफ्नो सिर्जनाहरू पस्किनेलाई तीन, तीन जना सहभागीलाई प्रथम, दोस्रो र तेस्रो छनौट गरेर नगद पुरस्कारसहित प्रमाणपत्र प्रदान गरिने आयोजकले जनाएको छ । आईआईएफटी स्कुल अफ फेसन एन्ड इन्टरियर डिजाइन विगत एक दशकदेखि फेसन तथा इन्टेरियर डिजाइनसम्बन्धी अध्ययन गराउँदै आएको कलेज हो । आईआईएफटीले आफ्नो विद्यार्थीका सिर्जना आम जनमानसमा परिचित गराउने उद्देश्यले यो कार्यक्रम गर्दै आएको हो ।