ग्लोबल आईएमई बैंकका ग्राहकलाई दशैँमा छुटैछुट

काठमाडौं  । ग्लोबल आईएमई बैंकले बडादशैँको अवसरमा ‘ग्लोबल आईएमई बैंकको साथमा दशैँ रमाइलो’ भन्ने नारासहित विभिन्न डिजिटल कारोबारहरूमा छुट तथा क्यासब्याक योजनाहरू सार्वजनिक गरेको छ ।

बैंकको डेबिट तथा क्रेडिट कार्डबाहकले आफूलाई आवश्यक सामान खरिद गर्दा बैंकको कार्ड प्रयोग गरी पस मेसिनबाट भुक्तानी गर्दा तीन सयदेखि पाँच सय रुपैयाँसम्मको नगद फिर्ता हुनेछ । यस नगद फिर्ता योजनामार्फत बैंकको डेबिट तथा क्रेडिट कार्डबाहकहरूले योजना अवधिभर कम्तीमा एक हजार रुपैयाँको तीनवटा कारोबार गरेमा तीन सय तथा पाँच वा सोभन्दा बढी पटक कार्डको प्रयोग गरी भुक्तानी गरेमा पाँच सय रुपैयाँको नगद फिर्ताबाट लाभान्वित हुन सकिनेछ ।

यस्तै मोबाइल बैंकिङ प्रयोगकर्ता ग्राहकहरूलाई लक्षित गरी छुट योजना पनि सार्वजनिक गरेको छ । यस योजनाअन्तर्गत बैंकका मोबाइल बैंकिङ प्रयोगकर्ताहरूले आफूलाई आवश्यक सरसमानहरू खरिद गर्दा क्यूआर कोड स्क्यानमार्फत भुक्तानी गर्दा दशैँ प्रोमो कोड प्रयोग गरी आफ्नो खरिद मूल्यमा १० प्रतिशत वा अधिकतम तीन सय रुपैयाँसम्मको नगद छुट पाउने बैंकले जनाएको छ । यो योजना असोज २८ गते घटस्थापनाको दिनदेखि कात्तिक ७ गते बडादशैँको दिनसम्म लागू हुने बैंकले जनाएको छ ।

बैंकले तीन सय ५० वटा शाखा, तीन सय ६९ वटा एटीएम, तीन सय २२ शाखारहित बैंकिङ सेवा, ६६ एक्सटेन्सन तथा राजस्व संकलन काउन्टर तथा तीनवटा वैदेशिक प्रतिनिधि कार्यालयसमेत गरी एक हजार एक सयभन्दा बढी सेवा केन्द्रबाट ४५ लाखभन्दा बढी ग्राहकहरूमाझ बैंकिङ सेवा प्रदान गरिरहेको छ ।