गाजाको अस्पतालमा आक्रमण हुँदा सयौँको मृत्यु

इजरायल । प्यालेस्टिनी क्षेत्रको गाजा सहरमा रहेको एक अस्पतालमा मंगलबार भएको विस्फोटनमा परेर चार सय ७१ मानिसको मृत्यु भएकोे छ । आक्रमणमा तीन सयभन्दा बढी घाइते भएको प्यालेस्टिनी स्वास्थ्य मन्त्रालयले बुधबार जनाएको छ ।

मंगलबार गाजा सहरको अल अहली अरब अस्पतालमा रकेट डोकिएपछि ठूलो विस्फोट भएको थियो । इजरायल र प्यालेस्टाइनी लडाकुसमूहले मंगलबार उक्त केन्द्रमा भएको आक्रमणका लागि एक–अर्कालाई दोषारोपण गरिरहेका छन् ।

प्यालेस्टाइनी अधिकारीहरूले इजरेली हवाई हमलाका कारण उक्त विस्फोट भएको बताएका छन् । इजरायली सेनाले भने प्यालेस्टिनी ‘इस्लामिक जिहाद’ समूहको असफल रकेट प्रक्षेपणको नतिजा भएको बताएकोे छ । संयुक्त राष्ट्रसंघले गाजा सहरको अस्पतालमा भएको हमलाको कडा शब्दमा निन्दा गरेको छ, राष्ट्रसंघले हिंसा र हत्याहरू पूर्णरूपमा रोकिनुपर्ने र यस्ता घटना रोक्न सबै राष्ट्र एकजुट हुनुपर्ने बताएको छ ।