सिटिजन्स क्यापिटलको १२ प्रतिशत नगद लाभांश पारित

काठमाडौं । सिटिजन्स क्यापिटल लि. (साबिकको सीबीआईएल क्यापिटल) ले १७ औं वार्षिक साधारण सभा सम्पन्न गरेको छ । सभाले आ.व. २०७९/८० को मुनाफाबाट १२ प्रतिशत नगद लाभांश बाँड्ने प्रस्ताव पारित गरेको छ ।

वार्षिक साधारण सभामा छलफलका लागि प्रस्तुत गरिएका प्रस्तावहरूमा आ.व. २०७९/८० को सञ्चालक समितिको वार्षिक प्रतिवेदन, लेखापरीक्षकको प्रतिवेदनसहित २०८० असारमसान्तको वासलात, नाफा–नोक्सानको हिसाब, नगद प्रवाह विवरणलगायतका वित्तीय विवरणहरू पारित गरेको छ । साथै, आव २०८०/८१ का लागि लेखापरीक्षण कार्य गर्नका लागि लेखापरीक्षकको नियुक्ति र निजको पारिश्रमिक निर्धारण एवं संस्थाको नियमावलीअनुसार गरिएको स्वतन्त्र सञ्चालकहरूको नियुक्ति अनुमोदन गरेको छ ।

सिटिजन्स क्यापिटलले नेपाल धितोपत्र बोर्डबाट सामूहिक लगानी कोषको व्यवस्थापन, धितोपत्र निष्काशन तथा बिक्री प्रबन्धक, लगानी व्यवस्थापन (पोर्टफोलियो म्यानेजमेन्ट), धितोपत्र प्रत्याभूतिकर्ता (अन्डर राइटर), सेयर रजिष्ट्रार तथा डि–म्याट खाताजस्ता लगानीकर्ताहरूसँग प्रत्यक्ष सरोकारका कामहरू गर्न अनुमति प्राप्त गरी कार्यहरू गर्दै आइरहेको छ । सिटिजन्स बैंक इन्टरनेसनलको मर्चेन्ट बैंकिङ कारोबार गर्न स्थापित सहायक कम्पनी सिटिजन्स क्यापिटलमा सिटिजन्स बैंक, कर्मचारी सञ्चय कोष तथा प्रतिष्ठित उद्योगी व्यापारीहरूको लगानी छ । काठमाडौं डिल्लीबजारस्थित बाटुलेघरमा रजिष्टर्ड कार्यालय रहेको संस्थाले काठमाडौंभित्र तथा बाहिरसमेत सेवा प्रदान गर्दै आईरहेको छ ।

काठमाडौंबाहिरका लगानीकर्ताहरूले पुँजीबजारमा प्रत्यक्ष रूपमा सहभागी भई लगानी गर्न समस्या रहेको हालको परिस्थितिमा संस्थाले लगानी व्यवस्थापक (पोर्टफोलियो म्यानेजर)को सेवा सिटिजन्स बैंकका देशभरिका सम्पूर्ण शाखा कार्यालयहरूबाट प्रदान गरी इच्छुक लगानीकर्ताहरूलाई संस्थाको विज्ञ तथा अनुभवी व्यवस्थापन समूहबाट सेवा प्रदान गर्दै आएको छ ।