हेटौँडा सिमेन्ट उद्योग बन्द

मकवानपुर । हेटौँडा सिमेन्ट उद्योग सोमबारदेखि बन्द भएको छ । आर्थिक संकटको कारण देखाउँदै उद्योगले सिमेन्ट उत्पादन बन्द गरेको हो । समयमा कोइला खरिद गर्न नसक्दा सिमेन्ट उत्पादन बन्द गर्नुपरेको उद्योगले जनाएको छ ।

उद्योगमा मासिक तीन हजार छ सय मेट्रिक टन कोइला खपत हुनेगरेको बताइएको छ । उद्योगका महाप्रबन्धक वसन्तराज पाण्डेले दशैँको बिदा हुनुअघिसम्म सो उद्योग सञ्चालनमा रहेको र त्यस अवधिमा तीन लाख बोरा सिमेन्ट उत्पादन भएको जानकारी दिए । आर्थिक संकटका कारण बाह्य मुलुकबाट कोइला खरिद गर्न नसकिएको हुँदा सिमेन्ट उत्पादन बन्द गरिएको उनले बताए । आर्थिक संकटबारे संघीय सरकारका उद्योग तथा आपूर्तिमन्त्री र सचिवलाई जानकारी गराइएको र केही आर्थिक अनुदान उपलब्ध भएमा उद्योगलाई पुनः सञ्चालनमा ल्याइने उनले जानकारी दिए ।

कुल तीन लाख बोरा सिमेन्ट काठमाडौंलगायतका विभिन्न सहरमा बिक्रीवितरण तयारी गरिएको र यसको आम्दानी कोइला खरिद लगाइने उद्योगले जनाएको छ । चार दशक पुरानो उद्योगका मेसिन जीर्ण हुँदै गएकाले उत्पादन गर्न कठिनाइ भएको र उत्पादित सिमेन्ट सबै सहरमा बिक्रीवितरण गर्न समस्या भएको जनाइएको छ । कोइला खरिद गरी ल्याइएपछि मात्रै उद्योग पुनः सञ्चालनमा ल्याउन सकिने भएको महाप्रबन्धक पाण्डेले बताए । विसं २०३३ मा लामसुरेमा स्थापित सो उद्योगले विसं २०४३ साल मंसिर २६ गतेबाट व्यावसायिकरुपमा उत्पादन सुरुआत गरेको थियो । सो उद्योगमा करिब तीन सय ९० जना कर्मचारी कार्यरत छन् ।