दोलखाका खेलाडीहरुका लागि अक्षय कोष स्थापना

दोलखा । दोलखाका खेलाडीहरुका लागि अक्षय कोष स्थापना गरिएको छ । भीमेश्वर नगरपालिका ९ ले आयोजना गरेको अध्यक्ष कप उद्घाटन समारोहमा सम्बोधन गर्दै नेकपा (एकीकृत समाजवादी)की नेतृ संगीता पाख्रिनले अक्षय कोष स्थापनाको घोषणा गरेकी हुन् ।

‘म कुनै समय भलिबल खेलाडी थिए । यसकारण खेल क्षेत्र मेरो अभिरुचिको विषय हो । खेल र खेलाडीको आत्माविश्वास जगाउनुपर्छ’ नेकपा एस दोलखाको उपसचिवसमेत रहेकी पाख्रिनले भनिन्,‘दोलखा जिल्लाको खेलाडीको लागि अक्षय कोष स्थापना गर्छु ।’

अक्षय कोष घोषणा गरेकी पाख्रिनले उक्त औपचारिक समारोहमा १० हजार दिने घोषणा गरेकी छन् । उनले १० वर्षसम्म दोलखाको खेलाडीको लागि अक्षय कोषमा सहयोग गर्ने प्रतिबद्धता समेत गरिन् । उनले अक्षय कोषमा जम्मा भएको रकमले खेलाडीहरु दुर्घटनामा पर्दा आर्थिक अभावका कारण छट्पटिनुपर्ने बाध्यताको अन्त्य हुने विश्वास व्यक्त गरिन ।

अन्तरराष्ट्रिय जगतमा कुटनीतिक सम्बन्ध नभएको अवस्थामा समेत खेल क्षेत्रले नेपाल चिनाउने भएकाले खेलाडीको सम्मानका लागि अक्षय कोष स्थापना गरिएको बताइन । ०७९ सालको स्थानीय तहको निर्वाचनमा भीमेश्वर नगरपालिकाको उपमेयरको उम्मेदवार रहेकी पाख्रिनले भीमेश्वरको खेलाडी सदैब सक्षम र अब्बल हुनुपर्नेमा जोड दिइन । यसका लागि आफुले सक्ने सहयोग गर्ने धारणा राखिन । पाचौं र छैटौंको क्षेत्रीय भलिबल खेलाडी रहेकी पाख्रिन दोलखामा सक्रिय राजनीति गर्छिन ।

भीमेश्वर नगरको वडा–९ को वडा अध्यक्ष हिमाल श्रेष्ठको सभाध्यक्षतमा कार्यक्रम भएको थियो । करिब ३५ सय मिटर उचाइमा भएको अध्यक्ष कप कार्तिक १९ गतेसम्म हुने छ । उद्घाटन समारोहका बागमती प्रदेशका सांसद भरत बहादुर केसी, एनफाका उपाध्यक्ष दावा लामा, नेकपा एमालेका उपाध्यक्ष राजेन्द्र मानन्धर लगाएतको सहभागीता रहेको थियो ।