अस्ट्रेलियाको केन्द्रीय बैंकले बढायो ब्याजदर

सिड्नी । अस्ट्रेलियामा ब्याजदर १२ वर्षयताकै उच्च विन्दुमा पुगेको छ । उच्च मूल्यवृद्धि नियन्त्रण गर्न अस्ट्रेलियाको केन्द्रीय बैंक रिजर्ब बैंक अफ अस्ट्रेलियाले मंगलबार आफ्नो प्रमुख ब्याजदर बढाएको हो ।

केन्द्रीय बैंकले नगद दरलाई एक चौथाइ प्रतिशतले कडाइ गरेर चार दशमलव ३५ प्रतिशत बनाएको छ । यो सन् २०११ पछिको उच्च हो । गत सेप्टेम्बरमा केन्द्रीय बैंकको गभर्नर पद सम्हालेपछि मिसेल बुलको नेतृत्वमा ब्याजदर बढेको यो पहिलो पटक हो ।

अस्ट्रेलियामा मूल्यवृद्धि (मुद्रास्फीति)ले आफ्नो चरम सीमा पार गरिसकेको छ । केही महिनादेखि अस्ट्रेलियाको मुद्रास्फीति अपेक्षा गरिएभन्दा बढ्दो छ । गभर्नर बुलले मुद्रास्फीतिलाई निश्चित सीमाभित्र ल्याउन मौद्रिक नीतिलाई अझ कडा बनाउन आवश्यक भए नभएको आगामी दिन देखिने जोखिममा भर पर्ने बताएका छन् ।