छुट्टाछुट्टै स्थानमा भएका सवारी दुर्घटनाबाट छ जनाको मृत्यु

काठमाडौं । छुट्टाछुट्टै स्थानमा दुर्घटनामा परी छ जनाको मृत्यु भएको छ । इलाम, दाङ, कञ्चनपुर, रूकुम पश्चिम, सर्लाहीमा दुर्घटना हुँदा छ जनाको मृत्यु भएको हो ।

इलाम, रोङ गाउँपालिका–३ कोलबुङमा ना.६ ख ८४२४ नम्बरको बस सडकबाट करिब ३ सय मिटर तल खसेर आइतबार साँझ दुर्घटना हुँदा बसमा सवार २ जनाको मृत्यु भएको छ । मृत्यु हुनेहरूमा धनुषा धानुषाधाम नगरपालिका–९ धारापानी बस्ने १२ वर्षीय अर्पण लामा र सोही ठाउँ बस्ने ३५ वर्षीया मनवती लामा रहेका छन् । दुर्घटनामा गम्भीर घाइते भएका उनीहरूको बिएण्डसी अस्पताल बिर्तामोड झापामा उपचारको क्रममा मृत्यु भएको हो । साथै दुर्घटनामा घाइते भएका बसमा सवार ३४ जनाको सोही अस्पतालमा उपचार भइरहेको छ ।

दाङ, तुलसीपुर उपमहानगरपालिका–१८ ग्वारखोलामा रा.७४ प ८४६४ नम्बरको मोटरसाइकल र रा.७ प ६५५४ नम्बरको मोटरसाइकल एकआपसमा ठक्कर खाई आइतबार साँझ दुर्घटना हुँदा रा.७ प ६५५४ नम्बरको मोटरसाइकल चालक शान्तिनगर गाउँपालिका–५ बस्ने २८ वर्षीय अमृत केसीको मृत्यु भएको छ । दुर्घटनामा गम्भीर घाइते भएका उनको प्रादेशिक अस्पताल तुलसीपुरमा उपचारको क्रममा मृत्यु भएको हो । रा.७४ प ८४६४ नम्बरको मोटरसाइकल चालकलाई प्रहरीले नियन्त्रणमा लिएको छ ।

कञ्चनपुर, बेदकोट नगरपालिका–७ डाउनास्थित सडकमा सु.प.प्र.०२–००४१ प २७०० नम्बरको स्कुटरलाई म.२ प ७४५६ नम्बरको मोटरसाइकलले सोमबार बिहान ठक्कर दिँदा स्कुटर चालक भिमदत्त नगरपालिका–९ ब्रह्मदेव बस्ने ४८ वर्षीय तारा सिंह कार्कीको मृत्यु भएको छ । दुर्घटनामा गम्भीर घाइते भएका उनको महाकाली प्रादेशिक अस्पताल महेन्द्रनगरमा उपचारको क्रममा मृत्यु भएको हो । साथै दुर्घटनामा घाइते भएकी स्कुटरमा सवार एक जनाको सोही अस्पतालमा उपचार भइरहेको छ । हाल फरार मोटरसाइकल चालकको प्रहरीले खोजी गरिरहेको छ ।

रूकुम पश्चिम, सानो भेरी गाउँपालिका–९ खारखोलास्थित सडकमा हाल अल्फाबेट नखुलेको ४२८८ नम्बरको मोटरसाइकलको ठक्करबाट सोही गाउँपालिका–९ हासिवाङ बस्ने ६५ वर्षीया कमला खड्का मगरको आइतबार साँझ मृत्यु भएको छ । ठक्करबाट गम्भीर घाइते भएकी उनको कर्णाली प्रदेश अस्पताल सुर्खेतमा उपचारको क्रममा मृत्यु भएको हो । हाल फरार मोटरसाइकल चालकको प्रहरीले खोजी गरिरहेको छ ।

सर्लाही, हरिवन नगरपालिका–९ नोचास्थित सडकमा मधेश प्रदेश ०३–००१ ज ०३४२ नम्बरको वीङ्गर गाडीको ठक्करबाट पैदलयात्री सोही ठाउँ बस्ने ५२ वर्षीया लक्ष्मी पोख्रेलको सोमबार बिहान मृत्यु भएको छ । दुर्घटनामा गम्भीर घाइते भएकी उनको स्वाभिमान अस्पताल हरिवनमा उपचारको क्रममा मृत्यु भएको हो । साथै ठक्करबाट घाइते भएका अन्य एक जनालाई उपचारको लागि लालगढ मोडेल अस्पताल धनुषा रिफर गरिएको छ । गाडी चालकलाई प्रहरीले नियन्त्रणमा लिएको छ । सबै दुर्घटनाका सम्बन्धमा प्रहरीले आवश्यक अनुसन्धान गरिरहेको जनाएको छ ।