ओपन एआईबाट निष्काशित अल्टम्यान माइक्रोसफ्टमा

सान फ्रान्सिस्को । च्याट जीपीटी निर्माता कम्पनी ओपन एआईबाट बर्खास्त भएका साम अल्टम्यान माइक्रोसफ्टमा आबद्ध भएका छन् । माइक्रोसफ्टका प्रमुख कार्यकारी सत्य नडेलाले अल्टम्यान अब माइक्रोसफ्टको नयाँ आधुनिक आर्टिफिसियल इन्टेलिजेन्स टोली हाँँक्ने जनाएका हुन् ।

ओपनएआईका सहसंस्थापक ग्रेग ब्रोकम्यान माइक्रोसफ्टमा आबद्ध हुने भएका छन् । ओपन एआईको बोर्डले सीईओ साम अल्टम्यानलाई बर्खास्त गरेपछि ब्रोकम्यान पनि अलग हुने घोषणा गरेका थिए । अल्टम्यान तीव्र गतिमा विस्तार भइरहेको आर्टिफिसियल इन्टेलिजेन्स (एआई)को क्षेत्रमा सबैभन्दा प्रभावकारी व्यक्ति मानिन्छन् ।

ओपन एआईको सीईओमा एमिट सेअर
ओपन एआईले ट्विचका सहसंस्थापक एमिट सेअरलाई नयाँ सीईओ नियुक्त गर्ने भएको छ । सेअरले एक्समा लेख्दै आफूले ओपन एआईले प्रस्ताव गरेको नयाँ जिम्मेवारी स्वीकार गरेको जनाएका छन् । ‘आज मलाई एउटा फोन आयो, फोनमा मलाई ओपन एआईको अन्तरिम सीईओ बन्नका लागि जीवनमा एक पटक प्राप्त हुने अवसरमाथि विचार गर्नका लागि आमन्त्रण गरियो, मेरो परिवारसँग परामर्श गरेपछि र केही घन्टासम्म विचार गरेपछि मैले उक्त पद स्वीकार गरेँ’, उनले सामाजिक सञ्जाल एक्समा भनेका छन् ।

कम्पनीबाट अन्य उच्च प्रोफाइलको प्रस्थानका साथै सह–संस्थापकलाई फिर्ता ल्याउनका लागि प्रमुख लगानीकर्ताहरूको दबाबमा ओपन एआईको बोर्डले शुक्रबार आफ्ना पूर्वसीईओ अल्टम्यानलाई बर्खास्त गरेको थियो ।