माइतीघर मण्डलामा निषेधाज्ञाविरुद्ध सर्वोच्चमा रिट

काठमाडौं । अधिवक्ता स्वागत नेपालले माइतीघर मण्डलामा निषेधाज्ञा जारी गर्ने जिल्ला प्रशासन कार्यालय, काठमाडौंको निर्णयविरुद्ध सर्वोच्च अदालतमा रिट निवेदन दर्ता गरेका छन् । जिल्ला सुरक्षा समिति, काठमाडौंले गरेको सिफारिसका आधारमा काठमाडौंका प्रमुख जिल्ला अधिकारी जितेन्द्र बस्नेतले सोमबारदेखि लागू हुने गरी ३० दिनसम्म माइतीघर–बानेश्वर क्षेत्रमा निषेधित क्षेत्र घोषणा गरेका थिए ।

निषेधित क्षेत्र घोषणा गरेसँगै अधिवक्ता नेपालले रिट निवेदनमा स्थानीय प्रशासनको निर्णय बदर गरी निषेधाज्ञाको निर्णय खारेज हुनुपर्ने र नागरिकले शान्तिपूर्ण रुपमा प्रदर्शन गर्न पाउनुपर्ने माग राखेका छन् । साथै, उनले बिना हातहतियार शान्तिपूर्ण रुपमा भेला हुने नागरिकको अधिकार कुण्ठित गर्न निषेधाज्ञाको निर्णय गरिएकोले रिट निवेदन दर्ता गरेको बताएका छन् । सर्वोच्च अदालत प्रशासनले उक्त निवेदनको प्रारम्भिक सुनुवाई आगामी बुधबारका लागि मिति तोकेको छ ।