एकै परिवारका तीन जना मृत फेला, ६ वर्षीया छोरी सकुशल

काठमाडौं । धनकुटा नगरपालिका वडा नम्बर १ निगालेमा एकै परिवारका तीन जना मृत फेला परेका छन् । जिल्ला प्रहरी कार्यालय धनकुटाका अनुसार निगालेका स्थानीय ३५ वर्षीय टिकाराम गुरुङ, उनकी श्रीमती ३६ वर्षीया भीमा र १० वर्षीय छोरा आयुष आज बिहान घरभित्रै झुन्डिएको अवस्थामा मृत फेला परेका हुन् ।

उक्त परिवारको ६ वर्षकी एक छोरी भने सकुशल छिन् । ज्याला मजदुरी गर्दै आएका टिकारामको परिवारमा चार जना थिए । ६ वर्षीया छोरी आशिका बाहेक सबै जना मृत भेटिएका हुन् ।

प्रहरीले भने टिकारामले श्रीमती भीमा र छोरा आयुषको हत्या गरेपछि आफूले पनि आत्महत्या गरेको हुनसक्ने आशङ्का गरेको छ । श्रीमान् श्रीमतीबीचको झगडाका कारण उक्त घटना भएको हुनसक्ने प्रहरीको अनुमान छ । प्रहरीले घटनास्थलमा अनुसन्धान गरिरहेको जनाएको छ ।