अमेरिका पठाईदिन्छु भन्दै ६४ लाखबढी ठगी गर्ने युवा पक्राउ

काठमाडौं । वैदेशिक रोजगारीको लागि अमेरिका पठाईदिन्छु भन्दै ६४ लाखभन्दा बढी रकम ठगी गर्ने एक युवा पक्राउ परेका छन् । कैलाली टिकापुर नगरपालिका घर भई हाल काठमाडौंको कोटेश्वर बस्ने २८ वर्षीय रमेश न्यौपाने बिहीबार पक्राउ परेका हुन् ।

गणेश अधिकारीसमेत गरी पाँच जनालाई वैदेशिक रोजगारीको लागि अमेरिका पठाईदिन्छु त्यसको लागि प्रतिव्यक्ति ४५ लाख रुपैयाँ लाग्छ र अमेरिका पुगेपछि मासिक ३० लाख रुपैयाँ तलबमा प्रतिष्ठित होटलमा काम लगाइदिन्छु भन्दै उनी ठगी गरेर फरार थिए ।

उनीहरुलाई विश्वास दिलाई प्रलोभनमा पारी पीडितहरुबाट पटकपटक गरी जम्मा ६४ लाख ४५ हजार रुपैयाँ रकम लिई न्यौपाने सम्पर्कविहीन भएका थिए । प्रहरी टोलीले उनको खोजतलास गर्ने क्रममा बिहीबार दिउँसो नयाँ बानेश्वरस्थित सिभिल अस्पतालबाट पक्राउ गरी थप अनुसन्धान तथा कारवाहीको लागि वैदेशिक रोजगार विभाग ताहाचल पठाइएको जनाएको छ ।