दुई किलो सुनसहित तीन जना पक्राउ

काठमाडौं । रसुवा जिल्लाको केरुङ नाका हुँदै भन्सार छली ल्याएको दुई किलो सुनसहित तीन जनालाई प्रहरीले पक्राउ गरेको छ । चन्द्रागिरी नगरपालिका–२ नागढुंगाबाट दुई किलोग्राम सुनसहित तीन जनालाई बिहीबार राति प्रहरीले पक्राउ गरेको हो ।

पक्राउ पर्नेहरूमा रसुवा गोसाइकुण्ड गाउँपालिका घर भएका २६ वर्षीय बिरू तामाङ, २१ वर्षीय सुनिल भुजेल र २८ वर्षीय ग्याल छिरिङ तामाङ रहेका छन् ।

भन्सार छली सुन ल्याउन लागेको भन्ने सूचनाको आधारमा काठमाडौं उपत्यका अपराध अनुसन्धान कार्यालयबाट खटिएको प्रहरीले रसुवाबाट काठमाडौंतर्फ आउँदै गरेको बागमती प्रदेश ०१–०२८ च २६९७ नम्बरको महिन्द्रा कम्पनीको स्कर्पियो गाडी नियन्त्रणमा लिई चेक जाँच गर्ने क्रममा उक्त गाडीको गियरबक्स एरियामा बिस्कुट आकारमा दुई थानमा रहेको उक्त पहेलो धातुसहित उनीहरूलाई पक्राउ गरेको हो ।

साथै, उनीहरूको साथबाट ६ थान मोबाइलसमेत प्रहरीले बरामद गरेको छ । उनीहरूलाई आवश्यक अनुसन्धान तथा कारवाहीका लागि जिल्ला प्रहरी परिसर टेकु पठाइएको छ ।