मन्दिरको सालिग्रामलगायतका सामानसहित एक जना पक्राउ

बर्दिया । मन्दिरको सालिग्रामलगायत सामाग्री चोरी गरेको अभियोगमा बर्दियाका ३४ वर्षीय महेन्द्र बिक पक्राउ परेका छन् । ठाकुरबाबा नगरपालिका–९ ठाकुरद्वारास्थित ठाकुरबाबा मन्दिर परिसर भित्रबाट चोरी गरेको एक किलोग्राम तौल बराबरको ठूलो सालिग्राम एक थान, तीन सय ग्राम बराबरको सालिग्राम तीन थान र दुई सय ५० ग्राम पितलको घोडा एक थानसहित सोही नगरपालिका–९ गोब्रेला बस्ने बिकलाई सोमबार बिहान प्रहरीले पक्राउ गरेको हो ।

उक्त मन्दिरमा चोरी भएको जानकारी प्राप्त हुनासाथ अस्थाई प्रहरी पोष्ट ठाकुरद्वाराबाट खटिएको प्रहरीले अनुसन्धानको क्रममा उनको घर तलासी गर्दा चोरी गरेका उक्त सामान फेला पारी उनलाई पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको जनाएको छ ।