१४ किलो सुन प्रकरणमा विमानस्थल सरसफाइका सुपरभाइजर पक्राउ

काठमाडौं । १४ किलो सुन प्रकरणमा त्रिभुवन अन्तर्राष्ट्रिय विमानस्थलमा कार्यरत सरसफाइ सुपरभाइजर पक्राउ परेका छन् । उनलाई छानबिन समितिले नियन्त्रणमा लिएको हो ।

यहि मंसिर २१ मा विमानस्थल भन्सार कार्यालयको टोलीले विमानस्थलबाट गोरखा बारपाक घर भएका ४५ वर्षीय चन्द्र घलेको साथबाट १४ किलो सुन बरामद गरेको थियो । घले दुबईबाट ल्याएको सुनसहित पक्राउ परिपछि उनको बयानका आधारमा सुन तस्करीमा संलग्न गोरखा घर भएका मीनबहादुर घलेलाई पनि सोही दिन प्रहरीले पक्राउ गरेको थियो ।

उक्त घटनाबारे छानबिन गर्न विमानस्थल भन्सार कार्यालयका उप–सचिव मणिराम पौडेलको नेतृत्वको समितिले छानबिन गरिरहेको छ । चन्द्र घले सुनको ‘भरिया’ भएको प्रहरी र भन्सार कार्यालयका अनुसन्धान अधिकृतहरूको अनुसन्धानबाट खुलेको छ । चन्द्रले दुबईबाट सुन ल्याउँदा एक पटकमा ६० हजार पाउने गरेको अनुसन्धान अधिकृतहरूलाई बताएका छन् ।

दुबईबाट ल्याएको सुन आगमन कक्षको डस्टबिनमा फालेर विमानस्थलबाट बाहिर ल्याउने गरी सुन कारोबारीहरूले योजना बनाएको तर सो योजना सफल नभएपछि चन्द्र घले पक्राउ परेका थिए । डस्टबिनमार्फत सुन बाहिर ल्याउने ‘सेटिङ’मा संलग्न रहेको देखिएपछि सरसफाइ सुपरभाइजरलाई पक्राउ गरिएको विमानस्थल भन्सार कार्यालयका एक अधिकृतले बताएका छन् । उनका अनुसार समितिले आज एक जनालाई पुनःपक्राउ गरेको र छानबिन पुरा गरेर यथार्थ बाहिर ल्याउने छ ।