२४ किलोग्राम गाँजासहित पाँच जना पक्राउ

काठमाडौं । अवैध लागूऔषध गाँजा करिब २४ किलो ६ सय ३० ग्रामसहित पाँच जना पक्राउ परेका छन् । ललितपुरबाट तीन जना, उदयपुर र म्याग्दीबाट एक/एक जना गरी पाँच जनालाई प्रहरीले आइतबार पक्राउ गरेको हो ।

ललितपुरबाट पक्राउ पर्नेमा लुभु बस्ने ५२ वर्षीय विरेन्द्र श्रेष्ठ, ४७ वर्षीय विरेन्द्र श्रेष्ठ र ५४ वर्षीय सुरेश श्रेष्ठ रहेका छन् । प्रहरी प्रभाग लुभु र प्रहरी वृत्त सातदोबाटोबाट खटिएको प्रहरीले उनीहरूलाई करिब ११ किलो एक सय ८० ग्राम गाँजासहित पक्राउ गरेको हो ।

उदयपुरबाट पक्राउ पर्नेमा बेलका नगरपालिका बस्ने २१ वर्षीय रबिन राई छन् । ईलाका प्रहरी कार्यालय रामपुर ठोक्सिलाबाट खटिएको प्रहरीले उनलाई करिब १३ केजी गाँजासहित आइतबार दिउँसो पक्राउ गरेको हो । म्याग्दीबाट पक्राउ पर्नेमा रघुगंगा गाउँपालिका बस्ने ४६ वर्षीय गोपाल दर्जी छन् । ईलाका प्रहरी कार्यालय दानाबाट खटिएको प्रहरीले उनलाई करिब एक केजी चार सय ५० ग्राम गाँजासहित अन्नपूर्ण गाउँपालिका काभ्रेबाट पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको जनाएको छ ।