मालीमा तैनाथ नेपाली शान्ति सैनिक स्वदेश फिर्ता

काठमाडौं । संयुक्त राष्ट्रसंघको आव्हानमा शान्ति स्थापनार्थमा तैनाथ रहेको ई.ओ.डी.गुल्म(शा.से.) नवौं डफ्फाका ५९ जना नेपाली शान्ति सैनिकहरू स्वदेश फिर्ता भएका छन् । सेनानी प्रज्वल थापाको नेतृत्वमा हातहतियार तथा बन्दोबस्तीका सामग्रीहरु सहित संयुक्त राष्ट्रसंघको चार्टर्ड विमानद्वारा टोली आज(सोमबार) फिर्ता भएको हो ।

संयुक्त राष्ट्रसंघले मालीमा रहेको शान्ति मिसन बन्द गर्ने निर्णय गरेसँगै उक्त मिसनमा तैनाथ ई.ओ.डि. गुल्मका एक सय ५६ एवं स्टाफ अधिकृत र सैनिक पर्यवेक्षक १२ समेत एक सय ६८ जना नेपाली शान्ति सैनिकहरु मध्ये ९३ जना यस अगावै स्वदेश फिर्ता भईसकेका छन् । उक्त मिसनमा बाँकी १६ जना नेपाली शान्ति सैनिकहरु पनि चाँडै स्वदेश फिर्ता हुने क्रममा रहेको सैनिक जनसम्पर्क तथा सूचना निर्देसनालयले जनाएको छ ।