४७ किलो अवैध चाँदीसहित तीन जना पक्राउ

काठमाडौं । काठमाडौं महानगरपालिका–२१ भोटेबहाल, कोटेश्वरलगायतका स्थानहरूबाट ४७ किलो अवैध चाँदीका विभिन्न गरगहनाहरूसहित तीन जनालाई प्रहरीले पक्राउ गरेको छ । पक्राउ पर्नेहरूमा बारा कैलया नगरपालिकाका ५० वर्षीय कामेश्वर शाह, पर्सा वीरगंज महानगरपालिकाका ३२ वर्षीय सुमन कुमार सरार्फ र बारा बिश्रामपुर गाउँपालिकाका २० वर्षीय मनिष सरार्फ रहेका छन् ।

भोटेबहाल, कोटेश्वरलगायतका विभिन्न ठाउँमा राजश्व छलि गरि बिल–बिजक बिना चाँदीका गरगहनाहरु भण्डार गरी बिक्री गर्ने गरेको भन्ने सूचनाको आधारमा काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले अनुसन्धान गर्ने क्रममा उक्त कार्यमा संलग्न उनीहरूलाई पक्राउ गरेको हो । प्रहरीका अनुसार उनीहरूलाई राजस्व छलीसम्बन्धी कसूरमा थप अनुसन्धान तथा कारवाहीको लागि राजस्व अनुसन्धान विभाग हरिहर भवन ललितपुर पठाइएको छ ।