निष्ठापूर्वक जिम्मेवारी निर्वाह गरेमात्रै प्रहरीको मूल्य मान्यताले सार्थकता पाउछ: डीआइजी खनाल

पोखरा । गण्डकी प्रदेश प्रहरी प्रमुख प्रहरी नायव महानिरीक्षक (डीआइजी) विकाशराज खनालले सबै प्रहरी कर्मचारीले जिम्मेवारीलाई निष्ठापूर्वक ढङ्गले निर्वाह गरेमात्रै प्रहरी संगठनले अंगिकार गरेको मूल्य मान्यताहरुले सार्थकता पाउने बताएका छन् । प्रहरी कार्यालयमा रहेका विभिन्न शाखा, उपशाखाको निरीक्षणपश्चात् शाखामा कार्यरत प्रहरी कर्मचारीलाई व्यावसायिक प्रहरी सेवा प्रवाहलगायत अन्य विविध विषयमा सम्बोधन गर्दै उनले यस्तो बताएका हुन् ।

सो अवसरमा डिआइजी खनालले जस्तोसुकै परिस्थितिमा पनि संगठनको मूलभूत उद्देश्य प्राप्तिका लागि सबै प्रहरी प्रतिवद्ध हुनुपर्नेमा जोड दिए । डीआइजी खनालले प्रदेश मातहतका जिल्लाहरुको वर्तमान शान्ति सुरक्षाको अवस्था, प्रहरी परिचालन साथै जनशक्ति व्यवस्थापन र आगामी दिनमा आईपर्नसक्ने सुरक्षा चुनौती एवं समाधानका विषयमा प्रदेश अन्तर्गतका जिल्लाका प्रहरी प्रमुखहरुसँंग छलफल तथा अन्तरक्रिया गरेका थिए ।

साथै, डीआइजी खनालले संगठनको उद्देश्य र प्रहरी आचारसंहिता अनुरुप कार्यसम्पादन गर्ने कर्मचारीलाई पुरस्कृत र आचारसंहिता विपरीत जानेलाई कारवाही गर्न आफूले सञ्कोच नमान्ने स्पष्ट पारे ।

सो अवसरमा गण्डकी प्रदेश प्रहरी कार्यालयका प्रहरी उपरीक्षक विनोद शर्माले प्रदेशको समग्र शान्ति सुरक्षा तथा भौगोलिक अवस्थाका बारेमा डीआइजी खनाललाई जानकारी गराएका थिए । डीआइजी खनालले सोमबार गण्डकी प्रदेश प्रहरी प्रमुखको जिम्मेवारी सम्हालेका थिए ।