मोटरसाइकलको ठक्करबाट पैदलयात्री महिलाको मृत्यु

धनुषा । औरही गाउँपालिका–१ पौडेश्वर बजारस्थित सडकमा मोटरसाइकलको ठक्करबाट सोही ठाउँ बस्ने एक पैदलयात्री महिलाको मृत्यु भएको छ । प्रदेश २–०२–००४ प ९५६६ नम्बरको मोटरसाइकलको ठक्करबाट पैदलयात्री ६० वर्षीया कलादेवी दासको मंगलबार(आज) दिउँसो मृत्यु भएको हो ।

ठक्करबाट गम्भीर घाइते भएकी उनको नवजीवन अस्पताल जनकपुरमा उपचारको क्रममा मृत्यु भएको हो । हाल फरार मोटरसाइकल चालकको प्रहरीले खोजी गर्नुका साथै यस सम्बन्धमा आवश्यक अनुसन्धान गरिरहेको जनाएको छ ।