बीवाईडीको नयाँ सोरुम ललितपुरमा

काठमाडौं । बीवाईडीले ललितपुरमा नयाँ सोरुम सञ्चालनमा ल्याएको छ । बीवाईडीको ललितपुरका लागि आधिकारिक वितरकको रूपमा इको ड्राइभ अटोमोबाइल प्रालिले पुल्चोकमा उक्त सोरुम सञ्चालनमा ल्याएको हो ।

ललितपुर महानगरपालिकाका प्रमुख चिरीबाबु महर्जनले एक कार्यक्रमका बीच सो सोरुमको उद्घाटन गरेका थिए । उक्त अत्याधुनिक सोरुममा नेपालकै पहिलो स्पोर्टी इलेक्ट्रिक एसयूभी बीवाईडी एट्टो ३ र भर्सटाइल बीवाईडी डल्फिनलगायतका विभिन्न अत्याधुनिक इलेक्ट्रिक सवारी साधन हुनेछन् । विश्वको नम्बर १ न्यु इनर्जी भेइकल सेल्स च्याम्पियनको रूपमा बीवाईडीले अटोमोटिभ उद्योगमा क्रान्तिकारी परिवर्तन गर्न नेतृत्व गरिरहेको छ । ललितपुरमा उद्घाटन गरिएको नयाँ सोरुमले विश्वव्यापीरूपमा दिगो मोबलिटी समाधान प्रदान गर्ने बीवाईडीको प्रतिबद्धतालाई उजागर गर्ने कम्पनीको दाबी छ ।

यस्तै, कम्पनीले आगामी दिनमा छिट्टै ललितपुर क्षेत्रमा ग्राहक सेवा केन्द्रको समेत स्थापना गरिने जनाएको छ । सो केन्द्रमा विद्युतीय सवारी साधन प्रयोग गर्न चाहने ग्राहकका लागि आवश्यक जानकारी र सहयोग प्रदान गर्न तालिम प्राप्त कर्मचारीहरू रहने छन् । कम्पनीको यो नयाँ सोरुमसहित बीवाईडीका अब नेपालभर १२ सोरुम, ९ सर्भिस सेन्टर र १५ चार्जिङ प्वाइन्ट पुगेका छन् । यस सोरुम सञ्चालनले बीवाईडीको विस्तार रणनीतिमा एक महत्वपूर्ण कोशेढुङ्गाको कार्य गरेको कम्पनीले जनाएको छ ।