कांग्रेसकी नेतृ द्रौपदा शर्माको निधन, पूर्वमुख्यमन्त्री पोखरेललाई मातृशोक

पोखरा । गण्डकी प्रदेशका पूर्व मुख्यमन्त्री कृष्णचन्द्र पोखरेललाई मातृशोक परेको छ । उनकी आमा, नेपाली काङ्ग्रेसकी नेतृ द्रौपदा शर्मा पोखरेलको १०२ वर्षको उमेरमा आज (मंगलबार) बिहान ४ बजे सामाखुसी रानीबारीस्थित निवासमा निधन भएको हो ।

द्रौपदाका चार छोरा र दुई छोरी छन् । उनका पति गोबद्र्धन शर्मा पोखरेलको यसअघि नै निधन भइसकेको छ । उनका छोराहरु संविधानसभा सदस्य रामचन्द्र, गण्डकी प्रदेशका पूर्वमुख्यमन्त्री कृष्णचन्द्र, योजना आयोगको पूर्वउपाध्यक्ष डा.जगदीशचन्द्र र सुवास पोख्रेल तथा छोरीहरु प्रियंवदा र सत्यवती हुन् ।

स्वर्गीय गोबद्र्धधन शर्मा भने राणा शासनको विरोधमा निकै क्रियाशील रहेका थिए । गोबद्र्धन शर्मा पोखरेलको पञ्चायतले सर्वस्वहरण गरेपछि उनलाई २०१८ सालको जनक्रान्तिमा गिरफ्तार गरी पैदल हिँडाई पोखरा हिरासतमा ल्याइएको बताइन्छ ।

मृतक द्रौपदाको २००७ सालको जनक्रान्तिको समयदेखि प्रजातन्त्र पुन:स्थापनाका लागि महत्वपूर्ण योगदान रहेको चर्चा गरिँदै आइएको छ । उनी २००७ सालको जनक्रान्तिपछि स्थानीय महिला सङ्घको अध्यक्ष बनेकी थिइन् । नेपाली कांग्रेसमा लागेर तत्कालीन समयमा केन्द्रीय सदस्य समेत बनिसकेकी उनी गोबर्द्धन शर्मा स्मृति ट्रष्टको अध्यक्ष र संरक्षक भएर काम गरेकी थिइन् । उनको आजै पशुपतिमा अन्त्येष्टि गरिने पारिवारिक स्रोतले जनाएको छ ।