सेयरबजारमा साढे पाँच अर्बको कारोबार

काठमाडौं । लगातार तीन कारोबार दिनसम्म बढेको सेयरबजारमा कारोबार रकममा पनि सुधार देखिएको छ । मंगलबार नेप्से परिसूचक १४ दशमलव ८८ अंकले बढेर दुई हजार एक सय १९ दशमलव ६१ को विन्दुमा कायम भएको छ । यस्तै पाँच अर्ब ५४ करोड ४२ लाख रुपैयाँबराबरको एक करोड ५१ लाख ७८ हजार तीन सय ६८ कित्ता सेय किनबेच भएको छ ।

लगानीकर्ताको सम्पत्ति एकैदिन २४ अर्ब रुपैयाँले बढेको छ । बजार पुँजीकरण ३३ खर्ब ३१ अर्ब रुपैयाँ कायम भएको छ । कारोबारमा आएका दुई सय ४७ कम्पनीमध्ये एक सय ५२ वटाको सेयरमूल्य बढ्दा बजारमा हरियाली देखिएको हो । नेप्से परिसूचक बढे पनि ८५ कम्पनीका सेयरधनीले गुमाएका छन् भने १० वटा कम्पनीको सेयरमूल्य स्थिर रह्यो ।

बैंकिङ, फाइनानस र लघुवित्तबाहेकका सबै समूह बढेका छन् । बैंकिङ समूह शून्य दशमलव १७ प्रतिशत, लघुवित्त समूह शून्य दशमलव तीन प्रतिशत र निर्जीवन बीमा समूह शून्य दशमलव शून्य तीन प्रतिशतले घटेका छन् । यसदिन लगाानीकर्ताको आकर्षण अन्य समूहमा देखिएको छ । यो समूह तीन दशमलव ५६ प्रतिशतले बढेको छ । यस समूहका हिमालयन रि–इन्स्योरेन्स, मुक्तिनाथ कृषि कम्पनी, नेपाल रि–इन्स्योरेन्स, नेपाल दूरसञ्चार कम्पनीको सेयरमूल्य बढेको छ ।

यस्तै व्यापार समूह एक दशमलव ७६ प्रतिशत, होटल तथा प्रशोधन एक दशमलव ५९, जलविद्युत् एक दशमलव ४७, उत्पादन तथा प्रशोधन शून्य दशमलव ६७, लगानी शून्य दशमलव ६३, म्युचुअल फन्ड शून्य दशमलव ३६, जीवन बीमा शून्य दशमलव ३४ र विकास बैंक शून्य दशमलव ३१ प्रतिशतले बढेका छन् ।

चन्द्रागिरी हिल्स लिमिटेड, समाज लघुवित्त वित्तीय संस्था लिमिटेड र रावा इनर्जी डेभलपमेन्ट लिमिटेडको सेयरमूल्यमा सकारात्मक सर्किट लागेको छ । सबैभन्दा धेरै मिड सोलु हाइड्रोपावर लिमिटेडको सेयरमूल्य आठ दशमलव ३५ प्रतिशतले घटेको छ । कारोबार रकम र कारोबार भएका सेयरसंख्याका आधारमा सबैभन्दा धेरै हिमालय रि–इन्स्योरेन्स लिमिटेडको ७५ करोड २७ लाख ८६ हजार नौ सय १८ रुपैयाँबराबरको १० लाख ७० हजार एक सय ७२ कित्ता सेयर किनबेच भएको छ ।