अति खराब आर्थिक संकटबाट निस्किएको श्रीलंकाको दाबी

कोलम्बो  । श्रीलंकाले अति खराब आर्थिक संकटबाट बाहिर निस्किएको दाबी गरेको छ । आइतबार स्वतन्त्रता दिवसका अवसरमा राष्ट्रपति रानिल विक्रमासिंघेले आर्थिक संकटबाट विस्तारै बाहिर आएको बताएका हुन् ।

श्रीलंकामा विदेशी मुद्रा सञ्चितिको चरम अभाव र ऋण तिर्ने क्षमता खस्किएका कारण सुरु भएको आर्थिक संकट उत्पन्न भएको थियो । सन् २०२२ मा ४६ अर्ब अमेरिकी डलरबराबरको विदेशी ऋण तिर्न नसकेपछि श्रीलंका खाद्यान्न, इन्धन र अत्यावश्यक वस्तु आयात गर्न असमर्थ भएको थियो । आर्थिकरुपमा चरम संकट देखापरेपछि तत्कालीन राष्ट्रपति गोटाबाया रााजापाक्ष नागरिक आन्दोलनबाट पदच्युत भएका थिए ।

ऋण तिर्न नसकेपछि अन्तर्राष्ट्रिय मुद्रा कोष (आईएमएफ)को जमानत नियमनसम्बन्धी मितव्ययितापछि संकट बिस्तारै समाधान हुँदै गएको छ । आईएमएफले गतवर्ष मार्चमा श्रीलंकालाई दुई अर्ब ९० करोड अमेरिकी डलरबराबरको चारवर्षे कर्जाको पहिलो किस्ता जारी गरेको थियो ।

राष्ट्रपति विक्रमासिंघेले ‘आर्थिकरूपमा दिवालिया राष्ट्रको प्रतीक बनाइएको’ बारे स्मरण गर्दै परम्परागतरूपमा आयोजना गरिने वार्षिक सम्बोधनमा उनले बिस्तारै अति खराब आर्थिक सङ्कटबाट बाहिर आइरहेको बताएका हुन् । उनले चुनौतीहरु क्रमशः हट्दै गएको बताएका छन् ।

सन् २०२२ मा श्रीलंकामा वित्तीय सङ्कटको चरम बिन्दुमा पुुग्दा मुद्रास्फीति लगभग ७० प्रतिशत पुगेको थियो । अहिलेको श्रीलंकाको मुद्रास्फीति छ दशमलव चार प्रतिशत छ ।