बाँसबारी छाला जुत्ता कारखाना प्रकरणविरुद्ध अखिल क्रान्तिकारीद्वारा प्रदर्शन

काठमाडौं । महाराजगञ्जस्थित बाँसबारी छाला जुत्ता कारखानाको १० रोपनी जग्गा गैरकानुनी तरिकाले निजीकरण गरेको विरुद्ध अखिल क्रान्तिकारी(विप्लप निकट) विद्यार्थी संगठनले प्रदर्शन गरेको छ । बाँसबारीस्थित चाँदबाग स्कूल नजिकै अखिल क्रान्तिकारी विद्यार्थी संगठनका अध्यक्ष प्रकाश शाहीको नेतृत्वमा करिब २५ जनाको समुहले आज शुक्रबार दिउँसो विरोध गर्दै आन्दोलन गरेका हुन् ।

बाँसबारी छाला जुत्ता कारखानाबाट गैर–कानूनी रूपमा हडपेको १० रोपनी जग्गामा संचालित सीजी चाँदबाग स्कूललाई राष्ट्रियकरण माग गर्दै उनीहरुले विरोध प्रदर्शन सुरु गरेका थिए । त्यसैगरी, उनीहरुले १० रोपनी कब्जा भएको सरकारी जमीन फिर्ता गर, भूमाफियाहरु मुर्दाबाद, सिजी एजुकेशन फाउन्डेसनद्वारा संचालित चाँदबाग स्कूललाई तत्काल राष्ट्रियकारण गर लगायतका नारा लगाएका थिए ।

यसअघि महाराजगञ्जस्थित बाँसबारी छाला जुत्ता कारखानाको १० रोपनी जग्गा गैरकानुनी तरिकाले निजीकरण गरेको आरोपमा प्रहरीको केन्द्रीय अनुसन्धान ब्युरो (सीआईबी)ले व्यवसायी अरुण चौधरी र छाला जुत्ता कारखानाका तत्कालीन अध्यक्ष अजितमान सिंह थापालगायत तीन जनालाई पक्राउ गरेको थियो । अहिले उनीहरु तीनै जना हाजिरी जवानीमा छुटिसकेका छन् ।