बक्यौता नतिर्ने पाँच सय ११ व्यवसायीको एक्जिम कोड बन्द

विराटनगर । विराटनगर भन्सार कार्यालयले बेरुजु देखिएको रकम फर्छ्यौट नगर्ने र सरकारको निर्देशन समेत पालना नगर्ने पाँच सय ११ ब्यवसायीक फर्म र केही उद्योगसम्मको एक्जिम कोड बन्द गरेको छ । विराटनगर भन्सार कार्यालयले पुराना कारोबारका प्रज्ञापनपत्रबाट देखिन आएको थप छुट राजस्व असुल गर्न थालेपछि महालेखाले बेरुजु ठहर्याएका ११ वर्ष पुराना कारोबारबाट राजस्व असुल गरेको बताइन्छ ।

आन्तरिक लेखा परीक्षणबाट बेरुजु देखिएको कारोबारबाट राजस्व असुल गरेको विराटनगर भन्सारले जानकारी दिएको छ । विराटनगर भन्सार कार्यालयले बेरुजु फछ्र्यौटबाट माघ मसान्तसम्ममा तीन करोड ५० लाख रुपैयाँ राजस्व असुल उपर गरी सकेको जानकारी दिएको छ । महालेखाको प्रतिवेदनमा विराटनगर भन्सार कार्यालयले ४५ करोड रुपैयाँ बेरुजु फछ्र्याैट गर्नुपर्ने देखाएको छ । यो रकम आर्थिक वर्ष २०६९/७० देखि हालसम्मको भएको बताइएको छ ।

बेरुजु रकम असुलीसँगै कार्यालयले विभिन्न उद्योग र प्रतिष्ठानका गरी पाँच सय ११ वटा निकासी पैठारी संकेत नम्बर (एक्जिम कोड) बन्द गरेर तिनले गर्न पाउने आयात तथा निर्यातमा रोक लगाइसकेको प्रमुख भन्सार अधिकृत ज्ञानेन्द्रराज ढकालले जानकारी दिए । थप एक सय बढी व्यवसायीको एक्जिम कोड एक हप्ताभित्रमा बन्द हुने अवस्थामा रहेको पनि प्रमुख ढकालले जानकारी दिए । आयात तथा निर्यात गर्ने व्यवसायीले भन्सार कार्यालयबाट सम्बन्धित उद्योग वा प्रतिष्ठानका नाममा एक्जिम कोड लिनुपर्ने अनिवार्य कानुनी व्यवस्था छ । कार्यालयले यस्तो एक्जिम कोड बन्द गरेको अवस्थामा सम्बन्धित उद्योग वा प्रतिष्ठानका नाममा आयात तथा निर्यात ठप्प हुनेछ ।

विराटनगर भन्सार कार्यालयमा हाल दुई हजार चार सय एक्जिम कोड दर्ता कायम रहेका छन् । अहिले तीमध्ये एक हजार दुई सय एक्जिम कोडबाट विराटनगर भन्सार नाका प्रयोग गरी आयात तथा निर्यात भइरहेको प्रमुख ढकालले जानकारी दिए । महालेखाको प्रतिवेदनमा बेरुजु भनेर अंकित भइसकेको रकमलाई अर्को प्रतिवेदनले फर्छ्यौट गर्नुपर्दैन भनेर अभिलेखबाट नहटाएसम्म सरकारी बाँकीका रूपमा रहिरहने हुुँदा जुुन समयमा पनि सरकारी निकायले यस्तो रकम असुलउपर गर्न सक्ने छ । सोहीअनुसार अहिले महालेखाको निर्देशनअनुसार विराटनगर भन्सारले बेरुजु असुलीलाई तीव्रता दिएको प्रमुख भन्सार अधिकृत ढकालले जानकारी दिए ।