कामना सेवामा भिडियो केवाईसीमार्फत् अनलाइन खाता खोल्न सकिने

काठमाडौं । कामना सेवा विकास बैंकले आफ्ना ग्राहकहरूलाई अनलाइन माध्यमबाट खाता खोली ग्राहक पहिचान विवरण (केवाईसी) अध्यावधिक गर्ने मोड्युल सार्वजनिक गरेको छ ।

उक्त मोड्युल सार्वजनिक भएसँगै कामना सेवा विकास बैंकमा खाता खोल्नका लागि ग्राहक स्वयम् उपस्थित हुनुपर्ने छैन । अनलाइन माध्यमबाट खाता खोल्न सक्ने व्यवस्था यसअघि नै गरिएको भए पनि ग्राहकले आफ्नो विवरण अद्यावधिक गर्नका लागि बैंकमा स्वयम् उपस्थित नै हुनुपर्ने व्यवस्था थियो । उक्त प्रविधिलाई थप परिष्कृत बनाउँदै ग्राहकहरूले अनलाइन खाता खोल्ने क्रममा बैंक प्रतिनिधिसँग आफूलाई पायक पर्ने समय तय गरेर वा अनलाइन खाता खोल्ने क्रममा माग गरिएका कागजात तथा अन्य आवश्यक विवरण रेकर्ड गरी आफ्नो ग्राहक पहिचान विवरण (केवाईसी) अद्यावधिक गर्ने सकिने छ ।

यो सुविधा प्रयोग गर्न बैंकको डिजिटल प्लेटफार्म डिजी एकाउन्ट डट कामना सेवा बैक डटकममार्फत् खाता खोल्न र आफ्नो विवरण अद्यावधिक गर्न सकिने छ । बैंकले यो व्यवस्था ल्याएसँगै स्वदेश तथा विदेशमा रहेको जो कोहीले आफू अनुकूल विभिन्न प्रकारका खाता खोल्न सकिने भएको छ ।

वैदेशिक रोजगारीमा रहेका नेपाली नागरिकहरूले आफ्नो खाता खोलेर डिम्याट, मेरो सेयरलगायतका सुविधाहरू प्रयोग गर्न सकिने बैंकले जनाएको छ । बैंकले अनलाइन खाता खोल्ने प्रक्रियाको विस्तृत विवरण समेत सार्वजनिक गरेको छ । उक्त भिडियो बैंकको वेभसाइट तथा अन्य सामाजिक सञ्जालमा राखिएको बैंकले जनाएको छ ।