सामुदायिक लघुवित्तको अर्धवार्षिक समीक्षा

काठमाडौं । सामुदायिक लघुवित्त वित्तीय संस्थाले अर्धवार्षिक समीक्षा तथा रणनीतिक योजना र जोखिम व्यवस्थापन तालिम सम्पन्न गरेको छ । २०८० फागुन ५ गतेदेखि ७ गतेसम्म सञ्चालन भएको तीन दिने कार्यक्रममा सञ्चालक समितिका पदाधिकारीहरू, केन्द्रीय÷क्षेत्र कार्यालयका अधिकारीलगायत शाखा प्रमुखको सहभागिता थियो ।

कार्यक्रममा सहभागीबाट अर्धवार्षिक प्रगति समीक्षा, भावी रणनीति सम्बन्धमा विस्तृत छलफल गरिएको थियो । कर्जा जोखिम व्यवस्थापन, खराब कर्जा असुली र धाँदली नियन्त्रण सम्बन्धमा लघुवित्त क्षेत्रको विशेष स्रोतव्यक्ति गोविन्दबहादुर रावतले सहजीकरण गरेका थिए । स्वास्थ्य र सुरक्षाअन्तर्गत मधुमेह र उच्च रक्तचाप सम्बन्धमा डा सुमित प्रजापति र लघुम्यादी बीमा सम्बन्धमा रिलायबल नेपाल लाइफ इन्स्योरेन्स लिमिटेडका विभागीय प्रमुख बिजया पौडेलले सहभागीहरूसँग छलफल तथा अन्तर्क्रिया गरेका थिए ।

तालिम कार्यक्रममा केवाईसी, एएमएल सीएफटीसम्बन्धी र लेखासम्बन्धी व्यावहारिक तालिम तथा संस्थाको वर्तमान अवस्था, समस्या र सवालहरूमा सञ्चालक समितिका पदाधिकारीहरू एवम् केन्द्रीय अधिकारीहरूबाट सहभागीहरूसँग अन्तर्क्रियाको कार्य भएको थियो ।

कार्यक्रमका सभापति एवम् लघुवित्तका निमित्त प्रमुख कार्यकारी अधिकृत बेलुमाया मगरले तालिमबाट सिकेको ज्ञान सिप व्यवहारमा लागू गरी कार्यक्षमता र कार्यदक्षता वृद्धि गर्ने अपेक्षा राख्दै सम्बन्धित सबैलाई धन्यवाद दिई कार्यक्रमको समापन गरेकी थिइन् ।