सर्वोत्तमको आईपीओ बाँडफाँट : २६ जनाले पाए ५१ कित्ता, नौ लाख बढीको हात रित्तै

काठमाडौं  । नेपालमा पहिलो पटक बुक बिल्डिङ विधिबाट खुलेको सर्वोत्तम सिमेन्टको आईपीओ बाँडफाँट भएको छ । बिक्री प्रबन्धक ग्लोबल आईएमई क्यापिटलले एक औपचारिक कार्यक्रम आयोजना गरी आईपीओ बाँडफाँट गरेको हो । आईपीओमा मागभन्दा १८ दशमलव २३ गुणा बढी आवेदन परेको थियो ।

पहिले नै कोटाको आरक्षित सेयर पाइसकेका, धेरै पटक आवेदन दिएकाहरूको आवेदन रद्द भएको क्यापिटलले जानकारी दिएको छ । रितपूर्वक भरिएका कुल नौ लाख ५८ हजार नौ सय ५९ आवेदकहरूमध्ये ५५ हजार पाँच सय २१ जनाले कम्पनीको आईपीओ पाएका छन् । उनीहरूमध्ये २६ जनाले ५१ कित्ताका दरले पाएका छन् भने बाँकीले ५० कित्ताका दरले पाएको क्यापिटलले जानकारी दिएको छ ।

क्यापिटलका अनुसार ५० कित्ताका दरले सेयर पाएकामध्ये ६० कित्ता वा सोभन्दा बढीका लागि आवेदन दिएकाहरूबाट गोलाप्रथा गर्दा २६ जनाले थप १–१ कित्ताका दरले आईपीओ पाएका हुन् । कम्पनीले कुल कुल २७ लाख ७६ हजार ७६ कित्ता सेयर बाँडफाँट गरेको हो । सोही संख्याका लागि आवेदन माग गरिएको थियो । रितपूर्वक आवेदन दिएका नौ लाख तीन हजार चार सय ३८ जनाको हात रित्तो भएको कम्पनीको भनाइ छ । आईपीओको नतिजा केही घण्टापछि आईपीओ रिजल्ट डट सीडीएससी डट कम डट एनपीबाट हेर्न सकिनेछ । बुक बिल्डिङ विधिअनुसार मूल्य तय भई प्रतिकित्ता तीन सय ६० रुपैयाँ ९० पैसाका दरले कम्पनीले सर्वसाधारणलाई साधारण सेयर जारी गरेको थियो ।